आगलागीमा जलेर दुई बालबालिको मृत्यु

बागलुङ  । जिल्लाको अधिकारीचौर–३ घैयाखेत, बगाहस्थित गोठमा आगलागी हुँदा आज एकै परिवारका दुई जना बालबालिका जलेर मुत्यु भएको छ ।

मृत्यु हुनेमा सात वर्षीय यमलाल विक र तीन वर्षीया सम्झना विक छन् । चुल्होमा बलिरहेको आगो एक्कासी खरले छाएको गोठमा सल्किँदा आगलागी भएको प्रहरीले जनाएको छ ।

अभिभावक नभएका बेला गोठभित्र बसिरहेका दुवै बालबालिकाको जलेर मृत्यु भएको इलाका प्रहरी कार्यालय बुर्तिवाङका प्रहरी निरीक्षक कृष्ण रानाले जानकारी दिए ।

मृतकका आमा पारु विक बिहानै घाँस काट्न बारीमा गएका बेला उक्त घटना भएको हो । विकका श्रीमान् ओमबहादुर विक भने रोजगारीका लागि विदेशमा छन् ।

विक बालबच्चासहित अस्थायी रुपमा उक्त गोठमा बस्दै आएकी थिइन । घटना भएको ठाउँ नजिकै बस्ती नभएकाले बालबालिकाको समयमै उद्धार हुन नसकेको जनाइएको छ ।