धुलो नियन्त्रण गर्ने मेलम्ची खानेपानी निर्देशनालयको प्रतिबद्धता

काठमाडौ । मेलम्ची खानेपानी आयोजना निर्देशनालयले उपत्यकामा बढ्दै गईरहेको धुलो नियन्त्रणका लागि प्रभावकारी कदम चाल्ने प्रतिवद्धता जनाएको छ ।

खानेपानी पाईपलाईन बिस्तारका कारण उपत्यकाको हावा प्रदुषण हुँदै गईरहेका बेला निर्देशनालयले त्यसको नियन्त्रणका लागि प्रभावकारी कदम चाल्ने प्रतिवद्धता जनाएको हो । शुक्रबार काठमाडौंमा पत्रकार सम्मेलन गरी निर्देशनालयका निर्देशक तिरेशप्रसाद खत्रीले खानेपानीको पाईप लाईन विस्तारको क्रममा उडेका धुलो नियन्त्रण गर्ने प्रतिवद्धता जनाएका हुन् ।

उनले मेलम्ची खानेपानी आयोजनाको पानी उपत्यका भित्र्याउने क्रममा पाईप लाईनको विस्तारको काम भईरहेको र त्यसबाट हुने प्रदुषण कम गर्न पाईप लाईन विस्तारको कामलाई रातको समयमा गर्ने व्यवस्था मिलाइएको पनि स्पष्ट पारे ।

निर्देशनालयले सर्वसाधारणलाई पर्ने कठिनाई कम गन एक पटकमा सय मिटर मात्रै सडक खन्ने व्यवस्था पनि गरेको छ । त्यसै गरी मुख्य सडकमा खनिएका ट्रेन्चहरु पुरेर तत्काल सडक पुनस्र्थापना गर्ने र यसो गर्दा पाईप राखेको ८ घण्टा भित्रै सडक सुचारु हुने मापदण्ड पनि तय गरिएको छ ।

खानेपानीको पाईपलाईन विस्तार सम्पन्न भएपछि सडक सरसफाई गर्न पनि निर्देशनालयले सम्बन्धित निकायलाई सचेत गराएको छ । काठमाडौं उपत्यकामा मेलम्ची खानेपानी आयोजनाबाट प्राप्त हुने पानी वितरणका लागि पाइप लाईन विस्तार गर्ने क्रममा उपत्यकामा अत्याधिक वायु प्रदषण हुँदै आएको छ ।