जेट एयरवेजले ल्यायो प्रिपेड ग्लोबल पास, के छ यसको फाइदा ?

काठमाडौं । भारतको प्रमुख अन्तर्राष्ट्रीय एयरलाइन्स जेट एयरवेजले प्रिपेड जेट ग्लोबल पास नामक योजना सार्वजनिक गरेको छ । यो पासबाट यात्रुले सो एयरलाइन्सको ६६ आन्तरिक तथा अन्तर्राष्ट्र्ीय गन्तव्यहरुमा भ्रमण गर्नसक्ने छन् ।

उक्त प्रिपेड पास इकोनोमी र प्रिमियर गरी दुइ प्रकारमा उपलव्ध छन् । तिनको मूल्य क्रमशः भारु ५२,६७३ तथा ११९,३१२ तोकिएको छ । बुकलेटका रुपमा उपलव्ध प्रत्येक पासमा चारवटा प्रिपेड कुपन रहेको हुन्छ । बराबर भ्रमण गर्ने, जुनसुकै बेला अचानक भ्रमण गर्ने, तथा अन्तिम समयमा भ्रमण कार्यक्रम हेरफेर गर्नुपर्ने यात्रुहरुका लागि यो पास योजना विशेष उपयोगी सिद्ध हुने एयरवेजको विश्वास छ । यसले सिजनल रुपमा हुने मुल्यबृद्धिको असर यात्रुलाई पर्ने छैन किनकि यात्रुले कुपनमा उल्लेख भएको भाडा भुक्तानी गरे पुग्छ ।

यसका अतिरिक्त यात्रुले २० केजीसम्म सामान (लगेज) लग्न पाउनुका साथै उडानको तीन घन्टा अगाडि टिकट रद्द गर्दा क्यान्सिलेसन चार्ज नलाग्ने तथा उडान मिति परिवर्तन गर्दा अतिरिक्त जरिबाना तिर्नु पर्नेछैन । पाससँग आउने कुपन आफन्त वा साथीभाइलाई स्थानान्तर पनि गर्न मिल्नु यस योजनाको अर्को उल्लेखनीय विशेषता हो । खरीद गरेको मितिले छ महीना सम्म म्याद रहने यो प्रिपेड पास एयरलाइन्सको कार्यालय, ट्रभल एजेन्सी वा सिधै विमानस्थल काउन्टरबाट पनि प्राप्त गर्न सकिन्छ ।

गुणस्तरमा उत्कृष्टताका साथै विश्वका अग्रणी एयरलाइन्सहरुसँगको आवद्धताले गर्दा जेट एयरवेजले आफ्नो यात्रु संख्यामा उल्लेखनीय बृद्धि गर्न सफल भएको तथा यात्रुवर्गको सुविधामा अधिकतम ध्यान पु¥याई यात्रालाई अझ बढी सुखद बनाउन निरन्तर प्रयत्नरत रहेको जानकारी एयरवेजले गराएको छ ।