तौलिहवा–गोरुसिंगे सडक निर्माण अन्तिम चरणमा

कपिलवस्तु । तौलिहवा–गोरुसिंगे पक्की सडकको निर्माण कार्य अन्तिम चरणमा पुगेको छ । १४ किलोमिटर लामो सडक यही चैत महिनाभित्रै निर्माण सम्पन्न हुने सडक डिभिजन कार्यालय कपिलबस्तुले जनाएको छ ।

प्रमुख राजमार्गदेखि सदरमुकाम तौलिहवा सम्म पुग्ने सबैभन्दा छोटो दुरीको यो सडक पक्की भएपछि २० मिनेटमा गोरुसिंगे देखि तौलिहवा पुग्न सकिन्छ । सडक निर्माण सम्झौता अनुसार ३० महिनाभित्र सम्पन्न गर्नुपर्ने भएपनि १८ महिनामै सडक निर्माण सम्पन्न हुन लागेको सडक डिभिजन कार्यालय कपिलबस्तुका सव–इन्जिनियर शान्तनु झाले बताए । ‘कुनै अवरोध नआए चैत १५ भित्रै काम सम्पन्न हुन्छ’ उनले भने ।
५ दशमलव ५ मिटर चौडा पक्की र साईट सोल्जर गरी ७ मिटर चौडा सडक रहेको छ । सो सडकमा गिट्टी बिछ्याउने बेसको काम र प्राईम कोर्डको काम संपन्न भईसकेको छ । त्यसमध्ये करिब ७ किमि डिबिएसटी प्रबिधिको पक्की सडक निर्माण कार्य समेत पुरा भएको छ । निर्माण कम्पनी भैरव कन्ट्रक्सन प्रालि, काठमाडौंले ठेक्कापाएको उक्त सडक निर्माणको कुललागत ९ करोड १६ लाख रहेको छ ।