काठमाडौं–निजगढ द्रुतमार्ग समयमै सम्पन्न गर्ने सरकारी प्रतिवद्धता

काठमाण्डौ । सरकारले काठमाडौं निजगढ द्रुतमार्ग आयोजना निर्माण कार्य समयमै सम्पन्न गर्ने प्रतिवद्धता जनाएको छ । भौतिक पूर्वाधार तथा यातायात मन्त्री रमेश लेखकले आयोजनको काम समयमै सम्पन्न गर्ने प्रतिवद्धता जनाएका हुन् ।

व्यवस्थापिका संसदको लेखा समितिको बुधबारको बैठकमा आयोजनाको हालसम्म भएको कार्य प्रगति विवरणबारे जानकारी गराउँदै मन्त्री लेखकले सरकार आयोजनाको कामलाई तीव्र गतिमा अघि बढाउन लागि परेको स्पष्ट पारे । मन्त्री लेखकले भने ‘स्वदेशी लगानीमै निर्माण गर्ने अघिल्ला सरकारको निर्णय र संसदीय समितिले दिएका निर्देशनको आधारमा आयोजनाको काम अघि बढिरहेको छ ।’
बैठकमा बोल्दै भौतिक पूर्वाधार तथा यातायात मन्त्रालयका सचिव धनबहादुर तामाङले आयोजनको काम समयमै सम्पन्न गर्न सरकार तयार लागि परेको बताए । उनले आयोजनाको काम सम्पन्न गर्न एकवर्ष मात्रै ढिलाभए १४ अरव लागत बढनेमा

सरकार सचेत रहेको उल्लेख गरे ।
आयोजनाका प्रमुख सत्पेन्द्र शाक्यले आयोजनाले हाल जग्गा अधिग्रहणको कामलाई तीव्र गतिमा अघि बढाएको बताए । उनले आयोजना निर्माणका लागि यसवर्ष १० अरव बजेट निकासा भएको र सोही अनुसार सडक सुधार र विस्तारका लागि टेन्डर आह्वान प्रक्रिया अघि बढाइएको पनि स्पष्ट पारे । शाक्यले जग्गा अधिग्रहणको काम करिव ९३ प्रतिशत सकिएको र त्यसका लागि थप ५ अरव बजेट आवश्यक पर्ने समेत जानकारी गराए ।

बैठकमा बोल्दै समितिका सदस्यहरुले आयोजना निर्माणको काममा ढिलाई गर्न नहुनेमा जोड दिएका थिए । समितिका सदस्य समेत रहनु भएका पूर्व अर्थमन्त्री विष्णु पौडेलले आयोजना निर्माणको काम काजगमा मात्रै अघि बढाइएको भन्दै सरकारको आलोचना गर्नु भयो । समितिका अर्का सदस्य राजेन्द्रकुमार केसीले आयोजनाको विस्तृत अध्ययण प्रतिवेदन तयार गर्नका लागि १ सय १२ अरव लागत लाग्ने निर्णयमा पुनर्विचार गर्न सरकारको ध्यानाकर्षण गराएका थिए ।

समितिले आयोजनाको हालसम्मको प्रगति विवरणबारे सम्बन्धित निकायसँग छलफल गरेको हो । बैठकमा समितिका सभापति डोरप्रसाद उपाध्यायले आयोजनाको निर्माणका लागि जग्गा अधिग्रहणको विषयमा विभिन्न उजुरी परेको र त्यस सम्बन्धमा पनि छलफल गरी आवश्यक निर्णय लिने बताए । काठमाडौं निजगढ दु्रतमार्ग राष्ट्रिय गौरवको आयोजना हो । सरकारले यो आयोजनालाई स्वदेशी लगानीमै सम्पन्न गर्ने लक्ष्य लिएको छ ।