३४ ट्रक चौँरी अनुमतिबिना निकासी

सोलुखुम्बु । करिब एक वर्षको अवधिमा सोलुखुम्बुबाट ३४ ट्रक चौँरी गाई निकासी भएको छ । जिल्ला पशु सेवा कार्यालय सोलुखुम्बुका वरिष्ठ पशु सेवा अधिकृत लेखराज दाहालका अनुसार गत वैशाखदेखि हालसम्म जिल्ला पशु सेवा कार्यालयबाट अनुमति लिएर सो सङ्ख्याको चाँैरी गाई जिल्ला बाहिर लगिएको हो । एउटा ट्रकमा साना बाच्छाबाच्छी करिब २०-२२ वटा र ठूला चौँरी १२-१३ वटाको दरले लैजाने गरेको उनले बताए ।

सडक सञ्जालले गाउँ जोडिएपछि व्यवसायीले जङ्गलमै पुगेर चौँरी गाई लैजाने गरेका हुन् । जिल्लाबाट सङ्खुवासभा, भोजपुर, पाँचथरलगायतका जिल्लामा लैजान अनुमति माग भएको र कतिपयले पाल्नका लागि लगेको र केही त्यहाँबाट तिब्बत निकासी भएको हुनसक्ने पशु सेवा कार्यालयले जनाएको छ ।

अत्याधिक रुपमा चौँरी गाई अन्यत्र निकासी हुन थालेपछि कार्यालयले नियन्त्रण र सङ्ख्या वृद्धिका लागि चासो देखाएको छ । यसका लागि कार्यालयले विशेष कार्यक्रम सञ्चालन गर्न लागेको पशु सेवा अधिकृत दाहालले बताए ।

चौँरी गाई बढी मात्रामा पाइने टाक्सिन्दु र काँकु गाविसमा यो कार्यक्रम लागू हुने छ । आगामी आवमा चौँरी गाईको व्यवस्थापनका लागि १० लाख ९१ हजार ५०० रकम खर्च गर्ने योजना बनाइएको कार्यालयले जनाएको छ । सो बजेटबाट चौँरीपालकलाई तालिम, अनुदान तथा चौँरी गाई सुरक्षालगायतका काम गरिनेछ ।