६ महिनामै उक्कियो कालोपत्र

सडक डिभिजन कार्यालयले ठेकेदार कम्पनीमार्फत सिरहा सदरमुकामस्थित थाना चोकदेखि पश्चिम हेमनारायण चोकसम्म निर्माण गरेको सडक ६ महिना नपुग्दै भत्किएको छ । सदिरमुकाम सरहाको मुख्य सडकमै कालोपत्र उप्किएर खाल्डाखुल्डी बढेपछि सर्वसाधारण सास्ती बेहोर्न बाध्य छन् ।

अन्य सहरी सडक शीर्षकअन्तर्गत सिरहा बजार सहरी सडक तथा भलुवाही–सारस्वरनाथ सडक गरी दुईवटा टुक्रे सडक गत असार मसान्तसम्म निर्माण सम्पन्न गर्न सडक डिभिजन कार्यालयले २०७२ चैत २६ गते चन्द्रमोहन कन्स्ट्रक्सन कम्पनी सिरहालाई ठेक्का दिएको थियो ।

कालोपत्र बिछ्याउँदा ठेकेदार कम्पनीले दरभाउपत्रमा उल्लिखित मापदण्ड अनुसरण नगरेका कारण सडक भत्किएको स्थानीयको आरोप छ । सडकछेउ कारोबार गर्ने साना व्यवसायीले धुलोले हैरानी बेहोर्नुपरेको छ । ‘हामीले सिरहा सदरमुकामको मूल सडक बनाउने, भत्किने र फेरि ठेक्का लगाएर मर्मत गर्ने प्रवृत्ति १० वर्षदेखि हेर्दै आएका छौं,’ थानाचोकको सडकछेउ फलफूल व्यवसाय गर्ने रुमा अमात भन्छिन्, ‘यो सडकमा आएजति बजेट सबै खल्तीमै हाल्ने गरेका छन् अनि कहाँबाट हुनु विकास ?’

मिलेमतोमा काम
ठेकेदार कम्पनीले दरभाउपत्रमा उल्लिखित मापदण्डअनुसार काम नगरे पनि सडक डिभिजन कार्यालयले बेवास्ता गरेको, कार्यालयकै मिलेमतोमा गलत काम भएको स्थानीयको आरोप छ । सडक डिभिजन कार्यालयले गत आर्थिक वर्ष प्रकाशित गरेको सिलबन्दी दरभाउपत्र सूचनाको ठेक्का नं. ५६ अनुसार १२ लाख ६८ हजार रुपैयाँको अनुमानित लागत भएको उक्त शीर्षकको ठेक्का सूचीकृत दर (सेड्युल रेट) भन्दा ६ हजार कममा स्वीकृत गरेको थियो ।

‘दरभाउपत्र आहान गरिसकेपछि प्रतिस्पर्धा हुनुपर्नेमा त्यो देखिएन,’ स्थानीयले भने, ‘सेड्युल रेटभन्दा ६ हजार रुपैयाँ कममा सकार गर्नुमा कार्यालयकै मिलेमतो देखिन्छ ।’ सडक भत्किएको र अनियमितता भएको गुनासोपछि पनि सडक डिभिजनले कारबाही गर्नु साटो फागुन ५ गते चन्द्रमोहन कन्स्ट्रक्सनलाई बाँकी रहेको ६ लाख ७२ हजार २ सय ४५ रुपैयाँ भुक्तानी दिएको थियो ।

ढाकछोप गर्न अर्को टेन्डर
सडक कमजोर बनेको विषय ढाकछोप गर्न डिभिजनले चोहर्वा–सिरहा–माडर सडक खण्ड मर्मतका लागि भन्दै १६ लाखह ७२ जार ८ सय ८० रुपैयाँ ६२ पैसाको लागत अनुमानमा अर्को बोलपत्र सूचना जारी गर्‍यो । उक्त ठेक्का साह कन्स्ट्रक्सन कम्पनी सिरहाले ११ लाख २९ हजार ५ सय ६ रुपैयाँमा सकार गरेको छ ।

‘ठेक्काको मूल्यांकन हामी आउनुभन्दा अगाडि नै भइसकेकाले ठेकेदार कम्पनीलाई भुक्तानी दिनुबाहेक केही गर्न सक्ने अवस्था थिएन,’ डिभिजन कार्यालयका सूचना अधिकृत इन्जिनियर चितरञ्जन यादवले भने, ‘सम्भवत: यसपालि लागेको मर्मतको ठेक्काले बिग्रिएको त्यो सडक पनि बन्छ होला ।’ डिभिजन इञ्जिनियर रामकुमार देवले उक्त सडक निर्माणबारे अनभिज्ञता प्रकट गरे ।