गैससमा सुशासन प्रवर्द्धन गर्न तालिम

रोल्पा  । जिल्लामा सञ्चालित गैरसरकारी संस्था (गैसस) हरुको आन्तरिक नियन्त्रण प्रणाली तथा संस्थागत सुशासन सम्बन्धी तालिम सोमवार लिबाङमा सम्पन्न भएको छ ।

नेपालमा गैससहरुको जवाफदेहिता र सुशासन प्रवर्द्धन कार्यक्रम अन्तरगत ३ दिनसम्म चलेको तालिम सोमवार समापन गरिएको छ । गैसस महासंघ रोल्पाका कार्यबाहक अध्यक्ष दीपा बुढाको अध्यक्षतामा भएको समापन कार्यक्रममा गैसस महासंघका क्षेत्रीय इञ्चार्ज शोभाराम डाँगी, क्षेत्रीय सचिव कमल बोहोरा लगायतको आतिथ्यता रहेको थियो । समापन कार्यक्रमको सञ्चालन गैसस महासंघ रोल्पाका सचिव भिमकुमारी विकले गर्नुभएको थियो ।
जिल्लामा सञ्चालित गैससका प्रमुखहरुको सहभागिता रहेको तालिममा आन्तरिक नियन्त्रण प्रणाली तथा सुशासन प्रवर्द्धन गर्ने बारे प्रशिक्षण दिइएको छ ।तालिममा उक्त क्षेत्रका प्रशिक्षकहरु नेत्रमणी आचार्य र नानीमैया वलीले प्रशिक्षण दिनुभएको थियो । तालिमले जिल्लाका गैरसरकारी संस्थाहरुको आन्तरिक नियन्त्रण प्रणाली र सुशासन, पारदर्शितामा उल्लेखनिय भूमिका खेल्ने अपेक्षा लिइएको गैसस महासंघ रोल्पाका कावा अध्यक्ष दीपा बुढाले बताउनुभयो ।