बार्सिलोना हार्दा रियल शीर्ष स्थानमा

म्याड्रिड । कप्तान सर्जियो रामोसले विजयी गोल गर्दा रियल म्याड्रिडले एक गोलले पछि परेको स्थिति उल्टाउँदै १० खेलाडीमा सिमित रियल बेटिसलाई पराजित गरेको छ ।

आफ्नो घरेलु मैदानमा २–१ को जित निकाल्दै रियल म्याड्रिड ला लिगाको शीर्ष स्थानमा उक्लेको छ ।

गोलकिपर केलर नाभासले गल्ती गर्दै एन्टोनियो सनाब्रियाको प्रहार आफ्नै पोष्टमा छिराएका थिए । त्यसअघि डार्को ब्रासानाचलाई फल हन्दा रातो कार्डबाट जोगिएका थिए ।

पहिलो हाफ सकिन अघि मार्सेलोको क्रसमा गोल गर्दै क्रिस्टियानो रोनाल्डोले खेल बराबरीमा ल्याए ।

खेल सकिन १२ मिनेट बाँकी छँदा लुकास भाजक्वेजलाई लडाएपछि बेटिसका डिफेन्डर माटेयो पिचिनीले रातो कार्ड खाए ।

जिनेदिन जिदानको टोलीका लागि महत्वपूर्ण समयमा गोल गर्ने बानी बनाएका कप्तान रामोसले पुनः एक पटक गोल गर्दै रियललाई विजयी बनाए ।

खेलको ८१ औँ मिनेटमा टोनी क्रुसको कर्नरलाई उनले जाली चुमाए ।

२६ खेलबाट रियलको ६२ अंक रहेको छ ।

उता, बार्सिलोना भने डिर्पोटिभो ला कोरुनासँग २–१ ले अप्रत्यासितरुपमा पराजित भएको छ ।

पेरिस सेन्ट जर्मेनविरुद्ध अविस्मरणीय जित निकालेर हौसिएको बार्सिलोना लिगको पुछारमा रहेको टोलीसँग स्तब्ध बनेको हो ।

घाइते नेयमार बिना निकै कमजोर खेल प्रदर्शन गरेको बार्सिलोना खेलको ४० औँ मिनेटमा पछि परेको थियो । जोसेलुले डिर्पोटिभोलाई अग्रता दिलाएका थिए ।

तर, दोस्रो हाफको शुरुवातसँगै लुइस सुवारेजले खेल बराबरीमा ल्याए ।

खेलको ७४ औँ मिनेटमा एलेक्स बर्गान्टिन्ओसले गोल गर्दै डिर्पोटिभोलाई जित दिलाए ।

सुवारेजले गोल गर्दा बार्सिलोनाले कुनै खेल हारेको यो पहिलो अवसर पनि थियो ।

२७ खेलबाट बार्सिलोनाको ६० अंक रहेको छ र ला लिगाको दोस्रो स्थानमा रहेको छ ।