रौतहटमा बृहत स्वास्थ्य शिविर : २ दिनमा २२ सयको उपचार

गौर ।  नेपाली सेना र स्वास्थ्य मन्त्रालयको सहकार्यमा रौतहटको गौरमा बृहत सघन स्वास्थ्य शिविर गरिएको छ । चैत ८ गतेदेखि शूरु भएको शिविरमा २ दिनमा २२ सय ३९ जनाले उपचार सेवा लिएका छन् ।
मन्त्रालय र सेनाले संयुक्त रुपमा एक साताका लागि सघन स्वास्थ्य शिविर आयोजना गरेका हुन् । शिविरमा पहिलो दिन ९ सय १२ र दोश्रो दिन १३ सय २७ जनाले उपचार गराएको नेपाली सेनाका कर्णेल दीपक अधिकारीले जानकारी दिए । नेपाली सेनाको मोबाइल अस्पताल सहित स्वास्थ्य मन्त्रालयको सहकार्यमा पहिलो पटक बृहत स्वास्थ्य शिविर आयोजना गरिएको अधिकारीले जानकारी दिए । शिविरमा रौतहटका विभिन्न क्षेत्रका स्थानीयका साथै सीमावर्ती भारतका विभिन्न स्थानबाट समेत उपचारका लागि विरामीहरु आएका छन् ।

शिविरमा एक्सरे, अप्रेशन लगायतका सघन उपचार सेवा दिइएको छ । बिहिबार दिँउसो नेपाली सेनाका सेनापति राजेन्द्र क्षेत्रीले शिविरको अवलोकन गर्दैछन् ।