अख्तियारले तिर्‍यो खानेपानी महसुल

काठमाडौँ । खानेपानी तथा सरसफाइ मन्त्रालयले खानेपानी बक्यौता तिर्न ताकेता पत्र काटेपछि सरकारी कार्यलयहरुले बक्यौता तिर्न सुरु गरेका छन् ।
खानेपानी तथा सरसफाइ मन्त्री जीवन शाहीको सक्रियतामा मन्त्रालयबाटै सुरु भएको बक्यौता रकम भुक्तानी गर्नेको सूचिमा पछिल्लो पटक अख्तियार दुरुपयोग अनुसन्धान आयोग थपिएको हो । अख्तियारले काठकाडौं उपत्यका खानेपानी लिमिटेडलाई ४६ हजार रुपैयाा खानेपानी महसुल तिरेको छ ।

मन्त्री शाहीले सुशासन कायम गर्न भन्दै राष्ट्रपति कार्यालय , उपराष्ट्रपति कार्यालय, सर्वोच्च अदालत, प्रधानमन्त्री कार्यालय, संसद सचिवालय, अख्तियार दुरुपयोग अनुसन्धान आयोग, निर्वाचन आयोग, राष्ट्रिय सतर्कता केन्द्र , महान्यायाधिवक्ताको कार्यालय,गृह , परराष्ट्र, अर्थ, रक्षा, भौतिक पूर्वाधार , स्थानीय विकास, पर्यटन, शिक्षा , स्वास्थ्य , शहरी विकास, कानून लगायतका २७ मन्त्रालय , सरकारी संस्था र स्थानीय निकायलाई खानेपानीको बक्यौता तिर्न पत्र काट्न लगाएका थिए ।

अन्य निकायले पनि बक्यौता तिर्न भन्दै ताकेता पत्र काटिएपछि खानेपानी महसुल तिर्ने विषयमा सकारात्मक प्रतिक्रिया दिइरहेको केयुकेएलले जनाएको छ । खानेपानी मन्त्रालयले सरकारी निकाय , सरकारी संस्था र स्थानीय निकायलाई बैशाख मसान्त भित्रको समय दिएर महसुल असुल गर्न पत्र काटेको छ ।

सरकारी निकायबाट बक्यौता उठाएपछि निजी क्षेत्रबाट बक्यौत असुल गर्न ताकेता गर्ने मन्त्रालयको तयारी छ । समयमै खानेपानी महसुल नतिर्नेको खानेपानी आपूर्ति बन्द र धारा बन्द गर्न मन्त्री शाहीले निर्देशन दिएका छन् ।