सात गोलको थ्रिलरमा चेल्सी विजयी

वार्टफोर्डविरुद्ध संघर्षपूर्ण जीत निकाल्दै चेल्सीले घरेलु मैदान स्टामफोर्ड ब्रिजमा प्रिमियर लिग जितेको खुसियाली मनाएको छ ।

सात गोल भएको रोमाञ्चक खेलमा चेल्सी ४–३ गोल अन्तरले विजयी बनेको हो ।

यस सिजन चेल्सी छाड्न लागेका जोन टेरीले खेलको २२ औँ मिनेटमा गोल गर्दै चेल्सीलाई अग्रता दिलाएका थिए । सेप्टेम्बरपछि पहिलो पटक खेलको शरुवाती टोलीमा परेका टेरीले गोल गर्दै यो सिजन चेल्सीका लागि सबै प्रतियोगितामा १ सयौँ गोल पनि पूरा गरेका छन् ।

तर, लगत्तै उनको गल्तीको फाइदा उठाउँदै इटिने कापुयेले गोल गर्दै वाटफोर्डलाई खेलमा फर्काए ।

सिजर एज्पिलिकुयेटाले गोल गर्दै चेल्सीलाई पुनः अग्रता दिलाए ।

खेलको दोस्रो हाफको शुरुवातमा नै मिची बात्सुयीले गोल गर्दै चेल्सीको अग्रता फराकिलो बनाए पनि डार्यल जनमातले वाटफोर्डका लागि गोल फर्काए ।

खेलको ७४ औँ मिनेटमा स्टेफानो ओकाकाले गोल गर्दै खेल ३–३ को बराबरीमा ल्याए पनि खेल सकिन दुई मिनेट बाँकी छँदा सिसेक फाब्रिगासले गोल गर्दै चेल्सीलाई जीत दिलाए ।
इन्जुरी समयमा सबास्टियन प्रोडीले रातो कार्ड पाए पनि वाटफोर्ड १० खेलाडीमा सिमित बनेको थियो ।