स्वाइन फ्लूको उपचारबारे सरकारको यस्तो भनाइ आयो

काठमाडौं । सरकारले स्वाइन फ्लू रोगका लागि आवश्यक औषधि उपचारको व्यवस्था गरिएको जनाएको छ । देशका विभिन्न भागमा स्वाइन फ्लूको संक्रमण भइरहेकाबेला स्वास्थ्य सेवा विभाग इपिडिमियोलोजी तथा रोग नियन्त्रण महाशाखाले विहीबार पत्रकार सम्मेलन गरी रोगको उपचारको व्यवस्था गरिएको जानकारी गराएको हो ।

पत्रकार सम्मेलनमा बोल्दै महाशाखाका निर्देशक डा. भीम आचार्यले स्वाईन फ्लू रोगको उपचारका लागि औषधिको व्यवस्था गरिएको बताए । उनले औषधि महंगो पर्ने भएकाले त्यसलाई निःशुल्क वितरण गर्ने व्यवस्था मिलाइएको पनि स्पष्ट पारे ।

निर्देशक आचार्यले रोगको पहिचान स्थानीय स्तरमा नभए केन्द्रमै सम्पर्क गर्न पनि सर्वसाधारणमा समेत अपिल गरे । विभागले एक सय ४ डिग्री भन्दा बढी ज्वरो आएमा स्वाइन फ्लू रोगको संक्रमण भएको हुन सक्ने उल्लेख गर्दै नजिकको स्वास्थ्य संस्थामा चेकजाच गराउन पनि अपिल गरेको छ ।

निर्देशक आचार्यले यो रोगबाट बच्न हातको सफाईमा विशेष ध्यान पनि आग्रह गरे । नेपालमा यो वर्ष स्वाइन फ्लूबाट ६ जनाको ज्यान गएको सरकारी तथ्यांकमा उल्लेख छ । यो रोगको प्रकोप वर्षायामको सूरु तथा अन्त्य र जाडो यामको सूरु र अन्त्यमा देखिने गरेको छ ।