फिफा अवार्डको अन्तिम मनोनयनमा मेसी, रोनाल्डो र नेइमार

प्रकाशित मिति : शनिबार, अशोज ७, २०७४

फुटबलको सर्वोच्च निकाय अन्तर्राष्ट्रिय फुटबल महासंघ (फिफा) ले वर्ष २०१७का उत्कृष्ट खेलाडी तथा प्रशिक्षकको अन्तिम मनोनयन शुक्रबार सार्वजनिक गरेको छ।

फिफाले सार्वजनिक गरेको पुरुष खेलाडीको मनोनयनमा बार्सिलोनाका अर्जेन्टिनी फरवार्ड लिओनल मेसी, रियल म्याड्रिडका पोर्चुगिज स्ट्राइकर क्रिस्टियानो रोनाल्डो र फ्रेञ्च क्लब पेरिस सेन्ट जर्मेनका ब्राजिलियन फरवार्ड नेइमार छन्।

मेसीले अहिलेसम्म पाँच पटक र रोनाल्डोले चार पटक यो अवार्ड जितिसकेका छन् । नेइमारले भने अहिलेसम्म अवार्ड जित्न सकेका छैनन्। अवार्ड आगामी २३ अक्टोबरमा आयोजित हुने समारोहमा सार्वजनिक गरिनेछ।

गत सिजनमा गरेको प्रदर्शनको आधारमा उकृष्ट खेलाडी घोषणा गरिने फिफाले जनाएको छ।

मेसी र नेइमारले गत सिजन बार्सिलोनाबाट खेलेका थिए भने रोनाल्डोले रियल म्याड्रिडबाटै खेलेका थिए।

मेसीले गत सिजन बार्सिलोनाबाट सबै प्रतियोगितामा ५२ खेल खेलेर ५४ गोल गरेका थिए। यता नेइमारले ४५ खेलबाट २० गोल गरेका थिए। यद्यपी, मेसी र नेइमारको बार्सिलोनाले ला लिगा तथा च्याम्पियन्स लिगको उपाधि भने जित्न सकेन।

४६ खेलमा ४२ गोल गरेका रोनाल्डो रियल म्याड्रिडले ला लिगा तथा च्याम्पियन्स लिग दुबैको उपाधि जित्दा उत्कृष्ट प्रदर्शन गरेका थिए।

अन्य विधाको मनोनयन

महिला खेलाडी

डेएना कास्टेलानोस (भेनेजुएला) – फ्लोरिडा

कार्ली लोयड (अमेरिका) – म्यानचेस्टर सिटी

लिके मार्टिन्स (नेदरल्यान्ड्स) – बार्सिलोना

पुरुष प्रशिक्षक

मासिमिनियानो एलेग्री (इटाली) – युभेन्ट्स

एन्टोनियो कोन्टे (इटाली) – चेल्सी

जिनेदिन जिदान (फ्रान्स) – रियल म्याड्रिड

महिला टिमको प्रशिक्षक

लिन्स नेलेसेन (डेनमार्क) – डेनमार्क राष्ट्रिय टिम