झापा–११ माथि मदन भण्डारी एकेडेमीको फराकिलो जित

झापा, वैशाख १९ । प्रदेश नम्बर–१ कै सर्वाधिक पुरस्कार राशि भएको दमक फुटबल प्रतियोगिता बुधबारदेखि सुरु भएको छ ।

दमकस्थित दमक बहुमुखी क्याम्पसको खेल मैदानमा भएको प्रतियोगिताको उद्घाटन खेलमा घरेलु टोली झापा–११ लाई फराकिलो अन्तरले पराजित गर्दै काठमाडौंको मदन भण्डारी स्पोर्टस् एकेडेमी क्वार्टरफाइनलमा प्रवेश गरेको छ ।

पाहुना टोली मदन भण्डारी एकेडेमीले झापालाई ४–० ले पराजित गरेको हो ।

एकेडेमीको जितमा विदेशी खेलाडी म्यापवेल एलनले २ गोल गरे । खेलको १२औं मिनेटमा म्यापवेलले एक गोल गर्दै एकेडेमीलाई अग्रता दिलाएका थिए ।

मदन भण्डारी एकेडेमीका लागि दोस्रो गोल प्रकाश बुढाथोकीले गरे । खेलको २५औं मिनेटमा सुजन राईको क्रसमा प्रकाशले हेडमार्फत् गोल गरेका हुन् ।

३४औं मिनेटमा म्यापवेलले व्यक्तिगत दोस्रो गोल गर्दा एकेडेमीले पहिलो हाफमा ३–० को अग्रता बनायो । सुजन राईको क्रसमा म्यापवेलले बललाई जाली चुमाएका थिए ।

खेलको ५८औं मिनेटमा विदेशी खेलाडी अबा नोरबर्ट केड्रियोले गोल गर्दै एकेडेमीलाई ४–० को अग्रता दिलाए । झापाका गोलरक्षक किशोर गिरीलाई छक्याउँदै उनले गोल गरेका हुन् ।

खेलको ‘म्यान अफ दी म्याच’ मदन भण्डारी एकेडेमीका सुजन राई घोषित भए । उनले नगद ११ हजार रुपैयाँ प्राप्त गरे ।

यसअघि, बुधबारै प्रधानमन्त्री केपी शर्मा ओलीले प्रतियोगिताको उद्घाटन गरेका थिए ।

दमक नगरपालिकाअन्तर्गत्को दमक नगर खेलकुद विकास समितिले प्रतियोगिताको आयोजना गरेको हो ।

प्रतियोगिताअन्तर्गत् बिहीबारको खेल दमक–११ र रुपन्देही–११ बीच हुने आयोजकले जनाएको छ ।

१० टिमले सहभागिता जनाएको प्रतियोगिताको विजेताले १३ लाख ११ हजार रुपैयाँ प्राप्त गर्ने जनाइएको छ ।