टिकट काउन्टरमा ‘सुराकी प्रहरी’

काठमाडौं । ट्राफिक प्रहरीले दसैं तिहारलाई लक्षित गर्दै भीडभाड हुने क्षेत्र र यातायात कम्पनीका टिकट काउन्टरहरूको गोप्य निगरानीका लागि सादा पोसाकमा ट्राफिक प्रहरी खटाउने तयारी गरेको छ ।

उपत्यकाका १४ स्थानमा नागरिक सहायता कक्ष स्थापना गरेको ट्राफिक प्रहरी महाशाखाले भीडभाड हुने स्थल र टिकट काउन्टरमा हुन सक्ने ठगी एवं आपराधिक क्रियाकलाप नियन्त्रण गर्न भन्दै सादा पोसाकका प्रहरी परिचालन गर्ने तयारी गरेको हो ।

यात्रुलाई ठग्ने, एउटै व्यक्तिले धेरैवटा सिटको टिकट बेच्ने, तोकिएको मूल्यभन्दा बढी रकममा टिकट बिक्री गर्नेजस्ता गुनासाहरू प्रत्येक वर्ष आउने गरेकाले त्यस्ता घटना हुन नदिन सादा पोसाकका प्रहरी खटाइने र उनीहरुले भीडभाड हुने स्थल र काउन्टरमा भइरहेको गतिविधिबारे सूक्ष्म निगरानी गर्ने ट्राफिक प्रहरीले जनाएको छ ।

ट्राफिक प्रहरीले यात्रुलाई सहज रूपमा यात्रा गर्ने वातावरण बनाउन र ठगिनबाट जोगाउन प्रत्येक वर्ष चाडपर्व लक्षित विशेष सुरक्षा योजना लागू गर्दै आएको छ ।

नजिकिँदो दसैंका लागि मात्रै उपत्यकामा १ हजार ४५० ट्राफिक प्रहरी पोसाकमा र १५० को संख्यामा सादा पोसाकका ट्राफिक प्रहरी परिचालन गर्ने तयारी भएको महानगरीय ट्राफिक प्रहरी महाशाखाका प्रमुख, प्रहरी वरिष्ठ उपरीक्षक (एसएसपी) वसन्त पन्तले जानकारी दिए ।

‘उपत्यकामा १ हजार ४५० ट्राफिकहरू पोसाकमा खट्नेछन्, यस्तै १५० प्रहरी सादा पोसाकमा खटाउने तयारी भएको छ, केहीलाई नागरिक सहायता कक्षमा परिचालन गरिसकेका छौं,’ महाशाखा प्रमुख पन्तले भने । -राजधानी दैनिकबाट