प्रधानमन्त्री ओलीको स्वास्थ्यमा निकै सुधार

काठमाडौं । प्रधानमन्त्री केपी शर्मा ओलीको स्वास्थ्यमा निकै सुधार आएको छ ।

छातीमा संक्रमणलगायतका समस्या भएपछि उपचारका लागि हिजो मनमोहन कार्डियोथोरासिस भास्कुलर सेन्टरमा भर्ना भएका प्रधानमन्त्री ओलीको स्वास्थ्यमा आज निकै सुधार आएको उनको उपचारमा संलग्न चिकित्सकहरुले जानकारी दिएका छन् ।

हिजोको तुलनामा आज बिहानै प्रधानमन्त्री निकै स्वस्थ देखिनुभएको उनका निजी चिकित्सक डा. दिलिप शर्माले जानकारी दिए ।

प्रधानमन्त्री ओलीले आज राम्रोसँग कुरा गर्न सक्ने भएका छन् । उनले आज बिहान केही झोलिलो पदार्थसमेत खाएका छन् ।

अस्पतालले उनको स्वास्थ्यको पछिल्लो रिपोर्ट अहिले १० बजेपछि सार्वजनिक गर्ने तयारी गरेको छ ।

दसैंका बेला बढी दौडधूप भएपछि सामान्य रुघाखोकी लागेका प्रधानमन्त्री ओलीलाई गत शुक्रबारदेखि ज्वरो आएको थियो ।

तर आइतबार रातिदेखि लगातार खोकी लाग्ने र स्वासप्रश्वासमा समस्या हुने भएपछि सोही राति नै अस्पतालमा भर्ना गरिएको थियो ।

प्रधानमन्त्री ओलीको उपचारमा प्रा. डा. अरुण सायमीको संयोजकत्वमा डा. दिब्या सिंह शाह र डा. सन्तकुमार दास संलग्न छन् ।

उनलाई केही दिन अस्पतालमै राखेर उपचार गरिने चिकित्सकहरुले बताएका छन् ।