साफ यु–१५ : भारतसँग नेपालको हार, तेस्रो स्थान पनि गुमायो

साफ यु–१५ फुटबल प्रतियोगिता अन्तर्गत तेस्रो स्थानका लागि नेपाल र भारतबीच भएको खेलमा पनि नेपालले हार व्यहोरेको छ।

अखिल नेपाल फुटबल सङ्घ (एन्फा) मैदान सातदोबाटोमा भएको खेलमा नेपाल भारतसँग १-० ले हार व्यहोर्दै तेस्रो स्थान पनि गुमाएको हो।

भारततर्फबाट १२ नम्बरका खेलाडी थ्लासिउ भान्लालुइफिलाले खेलको १९ मिनेटमा गोल गर्न सफल भए।

नेपाल सेमिफाइनलमा बिहीबार पाकिस्तानसँग ४–० गोलले पराजित भएको थियो भने भारत पनि बङ्गलादेशसँग पराजित भएको थियो।

प्रतियोगितामा समूह चरणको पहिलो खेलमा माल्दिभ्सविरूद्धको जित नै नेपालको एक मात्रै जित रह्यो। माल्दिभ्सविरुद्ध ४–० को सानदार जित निकालेको नेपालले दोस्रो खेलमा बङ्गलाादेशसँग २–१ गोल अन्तरले पराजित भयो।

पहिलो खेलमै पाकिस्तानसँग २–१ गोल अन्तरले पराजित भएको भारत अन्तिम खेलमा भूटानमाथि जित निकाल्दै सेमिफाइनल पुगेको थियो।

उक्त प्रतियोगिताअन्तर्गत आजै अपराह्न हुने अन्तिम चरणको खेलमा पाकिस्तान र बङ्गलादेश प्रतिस्पर्धा गर्नेछन्।