राष्ट्रपतिलाई गाडी किन्न पशुपतिमा भिख माग्दै युवा

काठमाडौं : राष्ट्रपति विद्यादेवी भण्डारीका लागि १८ करोडको गाडी खरिद गर्न केही युवाले पशुपति क्षेत्रमा भिख मागेका छन्। सरकारले राष्ट्रपतिको गाडी खरिदका लागि १८ करोड बजेट दिएको सांकेतिक विरोधमा युवाहरुले पशुपतिनाथ मन्दिर परिसरमा भिख मागेका हुन्।

संकेतिक विरोध स्वरुप भिख माग्न पशुपति क्षेत्रमा पुगेको यज्ञ ढकालले बताए। शनिबार बिहान ११ बजेदेखि उनीहरुले दुई घण्टासम्म भिख मागेर २३ सय ५० रुपैयाँ संकलन गरेका छन्। यो रकमबाट नमुना गाडी बनाएर राष्ट्रपतिलाई उपहार दिने योजना रहेको ढकालले बताए। यस विषयमा इन्जिनियर युवाहरुसँग छलफल भइरहेको उनको भनाइ छ।

सामाजिक सञ्जालमा सक्रिय स्वतन्त्र युवा शनिबार भिख माग्न पशुपति क्षेत्रमा पुगेका हुन्। भिख माग्ने कार्यक्रममा करिब दुई सय युवा सहभागी भएको ढकालको भनाइ छ।

युवाहरुले राष्ट्रपतिको गाडी खरिदको विरोध मात्र नभएर सरकारका सबै गतिविधिको सांकेतिक विरोधका लागि भिख मागेको बताएका छन्। ‘यो हाम्रो कार्यक्रम राष्ट्रपतिको गाडी खरिदको विरोध मात्र होइन’, ढकालले भने, ‘गणतन्त्रमा शासक नै सुविधाभोगी भएपछि गणतन्त्रमाथि नै प्रश्न उठ्न थालेको छ। यसलाई कम गर्न दबाबका लागि यो कार्यक्रम गरेका हौँ।