रग्बी विश्वकपको ट्रफी नेपाल ल्याइँदै, सगरमाथा आधारशिविरसम्म पुर्‍याइने

काठमाडौं, मंसिर १८ । जापानमा आगामी वर्ष आयोजना हुने रग्बी विश्वकपको ट्रफी बुधबार नेपाल आइपुग्ने भएको छ ।

विश्व रग्बी ट्रफी टुरअन्तर्गत् विश्वकप ट्रफी बुधबार अपराह्न ४ बजे नेपाल आइपुग्ने रग्बी संघका अध्यक्ष टंकलाल घिसिङले जानकारी दिए ।

नेपाल रग्बी संघको पहलमा नेपाल ल्याइन लागेको ट्रफी यही मंसिर २३ गतेसम्म नेपालमा राखिनेछ ।

नेपालमा रहँदा विश्वकप ट्रफी सगरमाथाको आधारशिविरसम्म पुर्‍याइने कार्यक्रम रहेको उनले जानकारी दिए ।

‘विश्व समुदायमाझ नेपाललाई चिनाउने प्रयासस्वरुप ट्रफीलाई विश्वसम्पदा सूचीमा समावेश सगरमाथाको आधारशिविर तथा स्वयम्भूनाथ, पशुपतिनाथ, बौद्धनाथ, पाटन दरबार स्क्वायरलगायत स्थानमा घुमाइनेछ’–उनले भने ।

ट्रफी मंसिर २० गते सगरमाथाको आधारशिविरमा लगिनेछ । मंसिर २१ गते विश्वसम्पदा सूचीमा रहेका स्थानहरु स्वयम्भूनाथ, बौद्धनाथ, पशुपति र पाटन दरबार स्क्वायरमा प्रदर्शनी गरिनेछ ।

त्यस्तै, मंसिर २२ गते टुँडिखेलमा आयोजना हुने रग्बी फेस्टिभलमा प्रदर्शनी गरिनेछ ।

फेस्टिभलमा नेपाली कलाकारको प्रस्तुतिसँगै स्कुल रग्बी प्रतियोगिता, महिला रग्बी सेभेन, पुरुष रग्बी प्रतियोगिता हुने आयोजकले जनाएको छ । उक्त कार्यक्रममा उपराष्ट्रपति नन्दबहादुर पुन सहभागी हुने कार्यक्रम छ ।

नेपालमा रग्बीको विश्वकप ट्रफी पहिलोपटक आउन लागेको हो ।

नेपालमा यसअघि विश्वकप फुटबल र अघिल्लो महिना विश्वकप क्रिकेटको ट्रफी ल्याइएको थियो ।

रग्बी विश्वकप सन् २०१९ को सेप्टेम्बर २० देखि जापानमा आयोजना हुँदैछ ।

एसियामा पहिलोपटक रग्बीको विश्वकप हुन लागेको हो । विश्वकपमा २० राष्ट्रले प्रतिस्पर्धा गर्नेछन् । रासस