डा. केसीको स्वास्थ्य थप जटिल बन्दै

चिकित्सा शिक्षा र सेवा सुधारको माग राख्दै इलाममा आमरण अनसनरत डा गोविन्द केसीको स्वास्थ्य थप जटिल बन्दै गएको छ । डा केसीको मुटुको चाल अनियमित भएको र शरीरमा अक्सिजनको मात्रा समेत घटेको उपचारमा संलग्न चिकित्सक विजेन्द्रकुमार साहले जानकारी दिनुभयो।

डा. केसीको दायाँ फोक्सोमा संक्रमण देखिएको र निमोनिया सुरु भएको, घाँटीमा समस्या देखिएको, सुगरको मात्रा कम भएको, रिंगटा लाग्ने, पेट फूल्ने, दुख्ने जस्ता समस्या देखा परेको डा. शाहले बताउनुभयो । डा. केसीलाई तत्काल आईसीयूमा लैजान चिकित्सकले सुझाव दिएका छन् । इलाम अस्पतालमा आईसीयूको व्यवस्था नभएकाले उहाँलाई सुविधासम्पन्न अस्पतालमा लैजान चिकित्सकले सुझाएका छन् । यद्यपि डा केसीले माग सम्बोधन नभएसम्म इलाम नछाड्ने अडान लिनुभएको छ ।

प्रतिनिधिसभाअन्तर्गत शिक्षा तथा स्वास्थ्य समितिले केसीसँगको सम्झौताविपरीत शिक्षा तथा स्वास्थ्य समितिले विधेयक बहुमतले अनुमोदन गरेपछि डा केसी गत २५ गतेदेखि इलाममा अनशन बस्नु भएको हो । अनशनको सातौं दिन हुँदासम्म सरकारका तर्फबाट भने उहाँको माग सम्बोधनबारे कुनै पहल भएको छैन ।

यसैबीच माघीको अवसर पारेर प्रदेश ५ सरकारले २ दिन सार्वजनीक विदा दिएको छ । थारु र मगरहरुको बाहुल्य रहेको सो प्रदेशमा प्रदेश सरकारले आज र भोलि विदा दिएको हो । यसअघि माघीमा सार्वजनीक विदा थिएन । माघीको अवसर पारेर हिजो मुख्यमन्त्री कार्यालयमा शुभकामना आदानप्रदान तथा चियापान समारोहको आयोजना गरिएको थियो । मुख्यमन्त्री शंकर पोखरेलको निवास परिसरमा गरिएको शुभकामना समारोहमा प्रदेश सरकारका मन्त्रालय, मातहत कार्यालयसंगै स्थानीय तहका प्रतिनिधि सहभागी भएका थिए ।

http://bit.ly/2FyzABV