यस्ता गल्ती नगर्नुस् बिग्रन्छ दाँत

हाम्रो आफ्नै बानीव्यवहारले आफ्नो दाँत बिगारिरहेका छौँ । खान हुने/नहुने सबै खान्छौँ । खाना खाइसकेपछि बिहान–साँझ दाँत माझ्दैनौँ । हाम्रा यी र यस्ता धेरै बानी छन्, जसले हाम्रो सौन्दर्य झल्काउने दाँत बिग्रिरहेको छ ।

कडा र जमेको आइस चपाउँदा दाँत भाँचिन सक्छ ।

धेरै तातो वा चिसो खानेकुराले पनि दाँत दुखाउन सक्छ ।

निदाएका वेला दाह्रा किट्ने बानीले पनि चाँडै दाँत
बिग्रन सक्छ ।

गर्मी मौसममा खाइने चिसो कोक, फ्यान्टा, स्प्राइटलगायतका बोतलको बिर्को दाँतले खोल्ने बानीले पनि दाँत बिगार्छ । यसरी दाँतले बिर्को खोल्दा दाँत भाँचिने सम्भावना हुन्छ ।

गुलियो पदार्थ मिसिएका सबै प्रकारका पदार्थले दाँत बिगार्छ ।

जतिवेला पनि जे पायो त्यही कुरा खाने बानीले पनि हाम्रो दाँत बिग्रन्छ ।

लामो समय चिसो पेय पदार्थ पिउने मानिसको पनि दाँत बिग्रने चिकित्सकहरूले
बताएका छन् ।

पढाइ गर्दा कलम, पेन्सिल टोक्ने बानी धेरैको हुन्छ । यस्तै साह्रो चिज टोक्ने बानी पनि धेरैको हुन्छ । यस्तो बानीले पनि हाम्रो दाँत बिग्रन्छ ।

अत्यधिक मात्रामा वाइन पिउने बानी छ भने आजैदेखि कम गर्नुहोस् । वाइनमा हुने एसिडले दाँतको इनामेल खियाउँदा हुने स–साना प्वालले दाँतमा दाग बस्ने र कुरूप देखिने हुन्छ ।

कतिपय मानिसमा अत्यधिक मिठाई खाने बानी हुन्छ । यसरी मिठाई खाँदा यसमा भएको गुलियोले दाँत बिगार्छ ।

अत्यधिक चुरोट तथा सुर्तीजन्य पदार्थको सेवनले दाँतमा दाग बस्ने मात्रै होइन, दाँत झर्ने र गिजासम्बन्धी विभिन्न रोग पनि लाग्न सक्छ ।