प्रकाशित मिति : शुक्रबार, चैत्र ८, २०७५
कपिलवस्तु । कपिलवस्तुको शिवराजमा भीषण आगलागीबाट ११ घर जलेर नष्ट भएका छन्। कपिलवस्तुको शिवराज नगरपालिका, ६ पैकीवण्डामा शुक्रबार दिउँसो भीषण आगलागी भएको प्रहरीले जनाएको छ ।
स्थानीय बुधई कुर्मीको फुसले छाएको कच्चीघरबाट सल्किएको आगलागीबाट ११ घर र ५ गोठ जलेर नष्ट भएको कपिलवस्तु प्रहरीले जनाएको छ ।
आगलागीबाट ५४ लाख बराबरको क्षति भएको प्रहरीले अनुमान गरेको छ। यस्तै आगलागीबाट ४५ वर्षीय शोन उल्ला मिया घाइते भएका छन्।
उनको अहिले स्थानीय मेडिकल कलेजमा उपचार भइरहेको छ । आगलागीमा परी एउटा गाई र दुइटा गोरु जलेका छन्।
स्थानीय बुधई कुर्मी, इलाकत मुसलमान, हरि मियाँ, राहद मियाँ, अब्दुल मुसलमान, भगवती पाल, अब्दुल कलाम मुसलमान, शोन उल्लाह मियाँ, किस्लावती कुर्मी, वहाप मुसलमान र बर्मा कुर्मीको घर जलेर नष्ट भएका छन्।
यसअघि पनि शिवराज नगरपालिकाको वनकसवासमा भीषण आगलागी भएको थियो। दमकल, प्रहरी, स्थानीयको संयुक्त प्रयासमा अपरान्ह ५ बजे आगो नियन्त्रणमा लिइएको छ।
© copyright 2016-2019 and all right reserved to jaljalakhabar | Site By : sobij
