सडक निर्माण भए पनि सवारीसाधन चल्दैन, सँधै गोरुगाडाकै भर

कञ्चनपुर । स्थानीय सरकार गठन भइसके पनि कञ्चनपुरको लालझाडी गाउँपालिकाको जनजीवन खासै सुधार हुन सकेको छैन ।

सदरमुकामबाट नजिकै रहे यातायातका साधन नचल्दा स्थानीय दैनिक जीवनयापन नै सास्तीपूर्ण बनेको हो ।

स्थानीय सरकार गठन भइसकेपछि अधिकांश स्थानीय तहमा सडक निर्माणलाई प्राथमिकतामा राखिएको छ ।

जसअनुसार नयाँ सडक सञ्जाल खुल्ने र भएका सडकहरुको व्यवस्थित गर्ने काम भइरहेको छ ।

तर कञ्चनपुरको लालझाडी गाउँपालिकामा सडक निर्माण भए पनि सार्वजनिक सवारीका साधन सञ्चालन नहुँदा जनताको जीवनमा कुनै सुधार आएको छैन ।

दैनिक उपभोग्य बस्तु किनमेल गर्न, उत्पादित वस्तु बजार पुर्‍याउन, आवतजावत गर्न तथा अस्पताल जान बढी समस्या परेको छ ।

सवारी साधनको नचल्दा गोरुगाडा, साइकलको माध्यमबाट आफ्नो गुजारा चलाउनुपरेको छ ।

सडक बनेपनि जनप्रतिनिधिको बेवास्ताका कारण आफूहरु समस्यामा परेको स्थानीयको गुनासो छ ।

यता लालझाडी गाउँपालिका अध्यक्ष मदनसेन वडायक भने आफूहरु आइसकेपछि गाउँको मुहार नै फेरिएको दाबी गर्छन ।

सार्वजनिक सवारीका साधन सञ्चालनका लागि विभिन्न यातायात समितिसँग छलफल भइरहेको र आगामी आर्थिक वर्षदेखि सवारी साधन चलाउने तयारी गरेको उनको भनाइ छ ।

सुदुरपश्चिम प्रदेशको अस्थाइ राजधानी धनगढीबाट १० किलोमिटरको दुरीमा पर्ने यहाँका स्थानीयले निकै सकसपूर्ण जीवन बिताइरहेका छन् ।

सामान्य स्तरका यस्ता सुविधाबाट जनतालाई वञ्चित गर्नु हुँदैन । त्यसको लागि जनप्रतिनिधिले तदारुकताका साथ ठोस कदम चाल्नुपर्छ ।