बैशाख २७ गतेदेखि प्रदर्शन हुँदै चलचित्र ‘जात्रै जात्रा’

काठमाडौं। सफल चलचित्र ‘जात्रा’को सिक्वेलको रुपमा बनेको ‘जात्रै जात्रा’ चलचित्रले आफ्नो प्रदर्शन मिति तय गरेको छ। चलचित्रका प्रस्तुतकर्ता रविन्द्र सिंह बाँनियाका अनुसार, अब यो चलचित्र वि.सं २०७६ साल वैशाख २७ गतेबाट रिलिज हुनेछ। चलचित्रलाई प्रदिप भट्टराइले निर्देशन गरेका हुन्।

‘जात्रै जात्रा’ले सुरुवातमा फागूण १७ गतेलाई प्रदर्शन मिति तय गरेको थियो। तर, चलचित्रका मुख्य नायक विपिन कार्कीको बाइक दुर्घटनामा परेर खुट्टा भाँचिएपछि चलचित्रको छायांकन प्रभावित भएको थियो। चलचित्रको छायांकन प्रभावित भएका कारण प्रदर्शन मिति पनि प्रभावित भएको थियो।

योसँगै बैशाख महिनामा आशा गरिएका २ चलचित्र ‘दाल भात तरकारी र जात्रै जात्रा’ रिलिज हुने भएका छन्।

चलचित्रमा यादव पौडेल र सिंगे लामाको लगानी छ। चलचित्रमा विपिन कार्की, बर्षा राउत, रविन्द्र झा र रविनद्र सिंह बाँनियाको मुख्य भूमिका छ।

चलचित्र ‘जात्रै जात्रा’मा नायक दयाहाङ राइलाई पनि विशेष अवतारमा देख्न सकिनेछ । यसैविच, चलचित्रमा समावेश ‘माया पिरिम’ बोलको गीत आइतबार सार्वजनिक गर्ने तयारी गरिएको छ। यो गीतमा करिश्मा मानन्धर, निश्चल बस्नेत, सारा सिर्पालीको नृत्य हेर्न सकिनेछ।