हावाहुरीले कैलाली विभिन्न ठाउँमा क्षति

धनगढी, २५ चैत ।कैलालीमा हावाहुरी र असिनापानीका कारण केही घर र कृषिमा क्षति पुगेको छ । हावाहुरीले बर्दगोरिया गाउँपालिका र गौरीगङ्गा नगरपालिकामा केही व्यक्तिको घरको छानो उडाएको छ । जिल्ला प्रहरी कार्यालय कैलालीका अनुसार बर्दगोरिया गाउँपालिकाको वडा नम्बर ४ स्थित बसन्तपुरमा पाँच जना स्थानीयको घरको छाना उडाएर हावाहुरीले क्षति गरेको छ । स्थानीय गगन कामीको चार कोठे कच्ची घरको छाना उडाउँदा एक लाख रुपियाँ बराबरको क्षति भएको प्रहरी नायब उपरीक्षक दक्षकुमार बस्नेतले जानकारी दिए । यसैगरी, सोही ठाउँका कृष्ण कामीको गाईगोठ, खदुवा कामीको घरको टिनको छाना, रैना चौधरीको जस्तापाताको छाना र देव बिकको घरको छानो उडाएको छ ।

यी व्यक्तिहरुको घरको छाना उडाउँदा क्रमशः तीन हजार पाँच सय, ६२ हजार, चार हजार पाँच सय रुपियाँ बराबरको क्षति भएको प्रारम्भिक विवरण आएको प्रहरी नायब उपरीक्षक बस्नेतले बताए ।यसैगरी, हावाहुरीले गौरीगङ्गा नगरपालिकाको वडा नम्बर ७ मा स्थानीय धनबहादुर बिकको एक तले घरको टिनको छानो उडाएको छ । यस्तै, हावाहुरी जानकी गाउँपालिकाको केही स्थानीय घरमा पनि क्षति पु¥याएको जनाएको छ । यसैगरी, टीकापुर नगरपालिकाको वडा नम्बर ६ र ७ मा पनि हावाहुरीले दर्जन बढी घरको छाना उडाएको छ । हावाहुरीले घर पनि भत्किएका नेपाल रेडक्रस सोसाइटी नारायणपुर उपशाखाका सभापति तुप केसीले जानकारी दिए ।शनिबार राति साढे आठ बजेतिर कैलालीमा हावाहुरी चलेको थियो ।

सोही दिन साँझ परेको असिना पानीले गहुँबाली र तरकारी खेतीमा पनि क्षति पु¥याएको छ ।जिल्लाको लम्कीचुहा नगरपालिकाको केही भू–भाग र कैलारी गाउँपालिका लगायतको क्षेत्रमा असिना पानी परेको थियो । असिनाले तरकारी र पाकेको गहुँबालीमा सामान्य क्षति गरेको विवरण आइरहेको कैलारी गाउँपालिका वडा नम्बर ७ का वडा अध्यक्ष कमलप्रसाद चौधरीले जानकारी दिए ।हिजो साँझ परेको असिना पानीले यत्रतत्र क्षति भएको विवरण आइरहेको छ’, उनले भने–‘हामी अझै विवरण सङ्कलनकै क्रममा रहेका छौं । तर, ठूलो क्षति हुनबाट जोगिएको छ ।’