पोलार्डको तुफानमा उड्यो पञ्जाव, अन्तिम बलमा जित्यो मुम्बई

काठमाडौं (एजेन्सी) । भारतमा जारी इण्डियन प्रीमियर लीग (आईपीएल)को बुधबार भएको खेलमा मुम्बई इण्यिन्सले किंग्स एलेभेन पञ्जावलाई तीन विकेटले पराजित गरेको छ ।

मुम्बई इण्डियन्सका कार्यबाहक कप्तान किरोन पोलार्डले तुफानी ब्याटिं गरेपछि १९७ रनको लक्ष्य मुम्बईले अन्तिम बलमा २ जोड्दै ७ विकेट गुमाएर पुरा गर्यो । अन्तिम ओभरको दोस्रो बलमा आउट हुनुअघि पोलार्डले ३१ बलमा ८३ रन बनाए । उनले सो क्रममा १० गगनचुम्बी छक्का प्रहार गरे भने ४ चौका प्रहार गरे ।

अन्तिम ओभरको अन्तिम बलमा निर्णय भएको खेल पोलार्ड आउट भएसँगै रोमाञ्चक मोडमा आएको थियो । अन्तिम ओभरमा १५ रनको आवश्यकता भएको बेला अंकित राजपुतको नो बेलमा पोलार्डले छक्का प्रहार गरे भने फ्री हिट बलमा चौका ।

यसरी एक बलमा ११ र जाडेपछि मुम्बईलाई ५ बलमा ४ रन आवश्यक थियो । तर, छक्का प्रहार गर्ने प्रयासमा पोलार्ड सीमा रेखा नजिकै समातिएपछि खेलले नयाँ मोड लियो । ४ बलमा ४ रन आवश्यक भएको अबस्थामा अल्जारी जोसेफले डट बल खेले । अब ३ बलमा ४ रन आवश्यक थियो । तर, चौथो बलमा जोसेफले एक रन लिए ।

पाँचौ बलमा राहुल चहरले एक रन लिए । अन्तिम बलमा २ रन आवश्यक हुँदा जोसेफले २ रन प्रहार गरेपछि मुम्बईले जित हात पार्यो ।

यसअघि टस हारेर पहिला ब्याटिंग गरेको पञ्जावले केएल राहुलको शतकको सहयोगमा १९७ रनको चुनौतिपूर्ण स्कोर बनाएको थियो । पञ्जावका लागि क्रिस गेलले पनि ६३ रनको योगदान दिएका थिए ।

जितसँगै मुम्बई ६ खेलमा ४ जितका साथ तेस्रो स्थानमा उक्लेको छ । समान अंक भए पनि पञ्जाव नेट रन रेटका कारण चौथो नम्बरमा रहेको छ ।
मुम्बईका नियमित कप्तान रोहित शर्मा घाइते भएकाले पोलार्डले यो खेलमा कप्तानी गरेका थिए । उनले कप्तानी सम्हालेको पहिलो खेलमै आफ्नै दममा टिमलाई जित दिलाए ।