भोजपुरमा प्रहरी र विप्लव कार्यकर्ताबीच गोली हानाहान, १ घाइते

भोजपुर । भोजपुरमा प्रहरी र विप्लव कार्यकर्ताबीच गोली हानाहान भएको छ। गोली लागेर एक जना विप्लव समूहका कार्यकर्ता घाइते भएका छन्।

भोजपुरको ट्याम्के मैयुम गाँउपालिका १ स्थित मैयुमडाँडा मुनिको धोद्रे जंगलमा प्रहरीको गोली लागेर घाइते भएका विप्लव कार्यकर्तालाई प्रहरीले नियन्त्रणमा लिएकाे छ।

घाइते भोजपुर षडानन्द नगरपालिका २ का ३२ वर्षका तीर्थराज घिमिरेलाई नियन्त्रणमा लिएको जिल्ला प्रहरी कार्यालय भोजपुरले जनाएको छ।

घिमिरेको खुट्टामा गोली लागेको जनाइएकाे छ। उनको साथबाट एक थान कटुवा पेस्तोल, पेस्तोलको गोली थान ५, लामो बाइनाकुलर १ थान, डेटोनेटर ४ थान, डेटोनेटर कर्ड अन्दाजी २० मिटर, बारुद र नेपाल कम्युनिष्ट पार्टीद्वारा जारी गरिएको विज्ञप्ति, पर्चा, पम्प्लेट समेत बरामद भएको प्रहरीले जनाएको छ।