कोपा फाइनल हारेपछि बार्सिलोनाका प्रशिक्षक भालभर्देको यस्तो प्रतिक्रिया

काठमाडौं। बार्सिलोनाका कोच अर्नेस्टो भालभर्दैले शनिबार राती भ्यालेन्सियासँग कोपा डेल रेको फाइनल हारेपछि पनि आफू बार्सिलोनाको भाग्य बदल्न दृढ रहेको बताएका छन् । एनफिल्डमा च्याम्पियन्स लिगको सेमिफाइलमा लिभरपुलसँग हारेपछि अप्ठ्यारोमा परेका भालभर्दे शनिबारको हारपछि झनै आलोचित छन् ।

यद्यपि भालभर्दै क्याम्प नोउ छाड्ने सोचमा छैनन् । ‘कोचहरुले सधैं भइरहेका घटनाहरुलाई फरक तरिकाले घुमाउन चाहन्छन्’ उनले भने ‘यदि तपाइँ मलाई क्वाटरफाइनलमा हार्ने वा फाइनलमा हार्ने भनेर विकल्प दिुहुन्छ भने म फाइनल रोज्छु । यदि मलाई च्याम्पियनस लिगको क्वाटर फाइनल र सेमिफाइनलमा एक रोज्न भनिएको भए मैले सेमिफाइनल भन्थें ।’

खेलमा भ्यालेन्सिया हावी थिएनन् तर उनीहरुले पाएका सबै अवसरको सदुपयोग गरेको भालभर्देको बुझाइ छ । ‘उनीहरु काउन्टर एट्याकमा धेरै राम्रा थिए र उनीहरु धेरै प्रभावकारी थिए’ भालभर्देले भने ‘हामीले धेरैजसो उनहिरुको क्षेत्रमा खेल्यौं र उनीहरुको डीबक्स आसपास रह्यौं तर हामीले यसलाई फिनिसिङ गर्न सकेनौं ।’