आईसीसी एकदिवसीय विश्वकप क्रिकेटः अस्ट्रेलियासँग हार्‍यो न्युजिल्यान्ड

साविक विजेता अस्ट्रेलियाले आईसीसी एकदिवसीय विश्वकप क्रिकेटमा न्युजिल्यान्डलाई ८६ रनले पराजित गरेको छ । लर्डस मैदानमा शनिबार राति भएको खेलमा फराकिलो जितसँगै अस्ट्रेलियाले शीर्ष स्थान थप बलियो बनाएको छ ।

दुई सय४४ रनको विजयी लक्ष्य पछ्याएको न्युजिल्यान्ड ४३.४ ओभरमा सवै विकेट गुमाएर एक सय ५७ रनमा समेटिएको थियो । न्युजिल्यान्डका लागि कप्तान केन विलियम्सनले सर्वाधिक ४० रन बनाए । रोस टेलरले ३०, मार्टिन गुप्टिलले २०, टोम लाथमले १४ र मिचेल सान्टनरले १२ रन बनाए । न्युजिल्यान्डलाई सस्तैमा समेट्न अस्ट्रेलियाका मिचेल स्टार्कले पाँच विकेट लिए । जासन पाउलले दुई तथा पाट कुमिन्स, नाथन लायन्स, स्टेभन स्मिथले एक एक विकेट लिए ।

यसअघि टस जितेर पहिले ब्याटिङ गरेको अस्ट्रेलियाले ५० ओभरमा ९ विकेटको क्षतिमा दुई सय ४३ रन बनाएको थियो । अस्ट्रेलियाका लागि उस्मान ख्वाजा र एलेक्स केरीले अर्धशतकीय पाली खेले । ख्वाजाले ८८ रन बनाए । केरीले ७१ रनको योगदान गरे । पाट कुमिन्सले अविजित २३, मार्कुस स्टोनिसले २१ र डेभिड वार्नरले १६ रन बनाए ।

न्युजिल्यान्डका ट्रेन्ड बोल्टले चार विकेट लिए । लक्की फर्गुसन र जेम्स निशमले दुई दुई विकेट लिए । केन विलियम्सनले एक विकेट लिएका थिए । यसअघिनै सेमिफाइनलमा पुगेको अस्ट्रेलियाले आठ खेलबाट १४ अंक बनाएको छ । यस हारले न्युजिल्यान्डलाई सेमिफाइनल पुग्न अन्य खेल कुर्नुपर्ने भएको छ । न्युजिल्यान्डको आठ खेलबाट ११ अंक छ ।