मेस्सीले गम्भीर आरोप लगाएपछि दक्षिण अमेरिकी फुटबल कन्फेडेरेसनको कडा प्रतिक्रिया

काठमाडौं। कोपा अमेरिकाको तेस्रो स्थानको लागि भएको खेलमा विवादित रेडकार्डको घटनापछि लियोनेल मेस्सीले दक्षिण अमेरिकी फुटबल कन्फेडेरेसन (कोन्मेबोल)माथि ब्राजिललाई जिताउन खोजेको आरोप लगाएसँगै कोन्मेबोलले कडा प्रतिक्रिया जनाएको छ ।

कोन्मेबोलले एक विज्ञप्ति जारी गर्दै भनेको छ ‘फुटबलमा कहिले तपाइँ हार्नुहुन्छ कहिले जित्नुहुन्छ तर खेलको आधारस्तम्भ भनेको खेलभावना र इमान्दारी तथा सम्मानका साथ नतिजा स्वीकार गर्नु हो । रेफ्रीको निर्णयमा पनि त्यही कुरा लागू हुन्छ । रेफ्रीहरु पनि मानिस नै हुन् र धेरै कुरा सुधार गर्दै जान्छन् ।’

विज्ञप्तिमा अगाडि भनिएको छ ‘जुन प्रतियोगितामा जहाँ १२ टिमहरु समान परिस्थितिमा प्रतिस्पर्धा गर्छन् त्यहाँ केही निराधार आरोपहरु लगाइएका छन् जो पूरै असत्य छन् । यी आरोपले कोपा अमेरिकाको अखण्डतामाथि प्रश्न उठाउँछन् र यस्ता आरोपहरु अस्वीकार्य छन् । यस्ता आरोपहरुले प्रतियोगिताप्रति सम्मानको कमीको प्रतिनिधित्व गर्छन् ।’