विश्वकप क्रिकेटको फाइनलमा ‘ओभरथ्रो’ सम्बन्धी निर्णयमा आफूले गल्ती गरेको स्वीकारे धर्मसेनाले

कोलम्बो, साउन ५ । अन्तर्राष्ट्रिय क्रिकेटका अम्पायर कुमार धर्मसेनाले विश्वकप क्रिकेटको फाइनलमा आफूले ‘ओभरथ्रो’ सम्बन्धी निर्णयमा गल्ती गरेको स्वीकार गरेका छन् ।

इंग्ल्याण्ड र न्यूजिल्याण्डबीचको फाइनल खेलमा धर्मसेनाले ‘ओभरथ्रो’ बापत इंग्ल्याण्डलाई अतिरिक्त चारसहित ६ रन दिएका थिए । त्यही रनका कारण निर्धारित ५० ओभरमा दुवै टिम बराबरीमा सीमित रहे ।

५०औं ओभरको चौथो बलमा न्यूजिल्याण्डका बलर ट्रेन्ट बोल्टले फालेको ‘फुलटस’ बललाई इंग्ल्याण्डका ब्याट्सम्यान बेन स्टोक्सले मिड विकेटतर्फ प्रहार गरेका थिए । एक रन तीव्रगतिमा बटुलेका उनले दोस्रो रनका लागि फर्कदैं गर्दा फिल्डर मार्टिन गुप्टिलले स्टम्पलाई निशाना बनाएर गरेको ‘थ्रो’ बेन स्टोक्सको ब्याटमा लागेर बाउन्ड्री पार पुगेको थियो । उक्त बलमा अम्यायर धर्मसेनाले ब्याट्सम्यानले लिएको २ रन र बाउन्ड्री पार बल पुगेका कारण अतिरिक्त ४ गरी जम्मा ६ रन दिएका थिए ।

ओभरथ्रो बापत दिइएको ६ रनका बारेमा धेरैले असन्तुष्टि जनाइरहँदा अम्पायर धर्मसेनाले पनि आफ्नो उक्त निर्णय गलत रहेको स्वीकार गरेका हुन् । एक अखबारमा अन्तरवार्ता दिँदै धर्मसेनाले गल्ती स्वीकार गरेका हुन् । तर उक्त निर्णयका बारेमा आफूलाई कुनै पछुतो नरहेको उनले बताए ।

उनले भने, ‘मलाई त्यसमा पछुतो छैन, किनकि अहिले धेरैले टिभी रिप्ले हेरेर आफ्नो धारणा बनाएका छन्, मैले त्यतिबेला त्यस्तो सुविधा पाएको अवस्था थिएन । मैदानमै रहेर मैले निर्णय दिनुपर्ने थियो ।’

आफूले लेग अम्पायरसँग सल्लाह गरेर उक्त निर्णय दिएको जिकिर गर्दै त्यतिबेला जे ठिक लाग्यो, त्यही निर्णय दिएको उनले बताए । अहिले टिभी रिप्ले हेर्दा आफूबाट गल्ती भएको महसुस गरेको उनको भनाइ छ ।

उनले नियमअनुसार त्यतिबेला ‘थर्ड अम्पायर’सँग सल्लाह लिनसमेत नमिल्ने अवस्था रहेको तर्क गरे । ‘त्यहाँ कोही रनआउट भएको अवस्था थिएन,’ उनले भने, त्यस्तो अवस्थामा हामीले थर्ड अम्पायरको सल्लाह लिन मिल्दैनथ्यो ।’

अन्तर्राष्ट्रिय क्रिकेटका पूर्व अम्पायर तथा पूर्व खेलाडीहरुले समेत उक्त ओभरथ्रो बापत इंग्ल्याण्डले ५ रन मात्र पाउनुपर्नेमा अम्पायरले ६ रन दिएर न्यूजिल्याण्डमाथि अन्याय गरेको टिप्पणी गरेका छन् ।