पश्चिममा हावाहुरी उच्च हिमाली क्षेत्रमा भारी हिमपात हुने सक्ने सर्तक रहन् आग्रह

काठमाडौं । अहिले नेपालमा पश्चिमी निम्न चापीय प्रणालीको प्रभाव रहेको जल तथा मौसम पूर्वानुमान महाशाखाले जनाएको छ । हाल देशको पश्चिमी भूभागमा सामान्यदेखि पूर्ण बदली हुनुका साथै मध्य तथा पूर्वी भूभागमा सामान्य बदली रहेको महाशाखाले उल्लेख गरेको छ ।

आज दिउँसो देशभर सामान्यदेखि पूर्ण बदली रही देशका केही स्थानहरुमा हल्का वर्षा हुने सम्भावना रहेको छ भने पश्चिमी उच्च पहाडी तथा हिमाली भूभागहरुमा भारी हिमपातका साथै मध्य तथा पूर्वका उच्च पहाडीसहित हिमाली भूभागमा हल्कादेखि मध्यम हिमपात हुने सम्भावना रहेको जनाइएको छ ।

देशका पश्चिमी भूभागका केही स्थानमा हावा हुरी आउने पनि सम्भावना रहेको जनाइएको छ । त्यस्तै आज राति देशभर सामान्य बदली रही पश्चिमी भेगका केही स्थानका साथै मध्य तथा पूर्वका थोरै स्थानहरुमा हल्का वर्षा हुने सम्भावना रहेको र पश्चिमी उच्च पहाडीसहित हिमाली भूभागहरुमा भारी हिमपातका साथै मध्य तथा पूर्वका उच्च पहाडीसहित हिमाली भूभागमा हल्कादेखि मध्यम हिमपात हुने सम्भाबना रहेको जनाइएको छ ।

भोलि शनिबार देशभर आंशिकदेखि सामान्य बदली हुनेछ भने केही स्थानमा हल्का वर्षाको सम्भावना रहेको पूर्वानुमान महाशाखाले जनाएको छ । उच्च हिमाली भूभागमा भारी हिमपात हुन सक्ने पूर्वानुमान गरिएको छ ।

शनिबार राति देशभर आंशिकदेखि सामान्य बदली हुनेछ भने उच्च पहाडीसहित हिमाली भूभागमा हिमपातको सम्भावना पनि औंल्याइएको छ ।

आउँदो आइतबार देशको पश्चिमी भूभागमा सामान्य बदली र मध्य तथा पूर्वका पहाडी भूभागमा आंशिकदेखि सामान्य वदली रही पश्चिमका थोरै स्थानका साथै मध्य तथा पूर्वका पहाडी भूभागमा हल्का वर्षा हुने सम्भावना पूर्वानुमान गरिएको छ ।

आगामी २४ घण्टा पश्चिमी उच्च पहाडीसहित हिमाली भूभागमा भारी हिमपातका साथै मध्य तथा पूर्वी उच्च पहाडीसहित हिमाली भूभागमा हल्कादेखि मध्यम हिमपात हुने सम्भावना रहेको छ ।

विशेष गरी पश्चिमी उच्च पहाडीसहित हिमाली भूभागका स्थानहरुमा सतर्कता अपनाउन महाशाखाले अनुरोध गरेको छ ।