प्रकाशित मिति : बुधबार, मंसिर २४, २०७७
काठमाडौं । खाद्य व्यवस्था तथा व्यापार कम्पनी लिमिटेड शाखा कार्यालय नेपालगन्जले कुपन प्रणालीबाट धान खरिद सुरु गरेको छ ।
कम्पनीले किसानलाई सहज तुल्याउन कुपन वितरण गरी सरकारले तोकेको समर्थन मूल्यमा धान खरिद गरिरहेको छ ।
तर, कुपन लिनका लागि लालपुर्जा देखाउनुपर्ने व्यवस्था गरिएपछि भने अधिया गर्ने किसानहरु चिन्तित देखिन्छन् ।
खाद्य व्यवस्था तथा व्यापार कम्पनी शाखा कार्यालय नेपालगन्जले कुपन प्रणालीबाट धान खरिद गर्ने व्यवस्था गरेपछि किसानहरुले सजिलै धान बिक्री गर्न पाएका छन् ।
कुपनअनुसार आफ्नो पालो परेको दिन प्रतिकुपन ५० क्विन्टलसम्म धान बिक्री गर्न पाउने व्यवस्था गरिएको छ ।
कम्पनीका मुख्य शाखा प्रमुख निर्मल थापाले किसानलाई वितरण गरिएको कुपनमा कृषकको विवरणसहित धानको अनुमानित परिमाण र धान लिएर आउने दिन तोकिएकोले किसानलाई सहज भएको बताउनुभयो ।
कुपन प्रणालीबाट धान खरिद भएपछि सहज भएको कृषकहरुले बताएका छन् ।
कुपन प्रणाली लागू गरेपछि कुपन वितरणमा भने भिड लाग्ने गरेको छ ।
कुपन लिनका लागि किसानले लालपुर्जा अनिवार्य देखाउनुपर्ने व्यवस्था गरिएको छ । यसबाट अधियाँ खेती गर्ने किसानले कुपन पाउन सकेका छैनन् । त्यसैले बिचौलियाहरुले चलखेल गरिरहेको गुनासो पनि किसानहरुको छ ।
स्थानीय किसान सिराज अहमदले ५० क्विन्टल धान बिक्री गर्न २५ कट्ठा जग्गाको लालपुर्जा देखाउनुपर्ने भएकाले समस्या भएको बताउनुभयो ।
कम्पनीको मुख्य शाखा कार्यालय नेपालगन्जले यस वर्ष पहिलो चरणमा ४० हजार क्विन्टल मोटा र मध्यम धान खरिद गर्ने लक्ष्य राखेको छ ।
© copyright 2016-2019 and all right reserved to jaljalakhabar | Site By : sobij
