काठमाडौं । बाँकेको नेपालगञ्ज उप–महानगरपालिका स्थित कारकाँदोमा डरलाग्दो दुर्घटना भएको छ । नेपालगञ्जबाट कोहलपुरतिर जाँदै गरेको बसेले उप–महानगर–१८ मा रहेको एसके पेट्रोल पम्प नजिकै पहिले ट्याक्टरलाई ठक्कर दियो ।

ना.५ख ५७७३ नम्बरको बसको ठक्करले ट्याटरले फन्को मारेको दृश्य सिसिटिभी फुटेजमा देखिन्छ । अनि, अनियन्त्रित हुँदै बस पसलमा पस्यो । दुर्घटनामा परेर आटोको शोरुममा बसिरहेका नेपालगञ्ज उपमहानगर–१३ बस्ने बिक्रम वृजबासीको मृत्यु भएको जिल्ला प्रहरी कार्यालय बाँकेका प्रवक्ता (डिएसपी) सुवास खड्काले बताए ।

बसले शुरुमा ठक्कर दिएको भे.१च ५१३४ नम्बरको ट्याक्टर चालक लडेर फेरि दौडिँदै चालक सिटमा चढेको सिसिटिभी फुटेजमा देखिन्छ ।

शुक्रबार भएको सो दुर्घटनामा परेर ७ जना घाइते भएका छन् । उनीहरुको नेपालगञ्ज नर्सिङहोममा उपचार भइरहेको छ । बस चालक राजकुमार बाल्मिकीलाई पक्राउ गरिएको डिएसपी खड्काले बताए ।