४० वर्षदेखि बिना सुनुवाइ भारतको जेलमा रहेका दुर्गाप्रसादको मुद्दामा ऐतिहासिक फैसला हुने

काठमाडौं। ४० वर्षदेखि बिना सुनुवाइ भारतको जेलमा बन्दी जीवन बिताइरहेका नेपाली दुर्गाप्रसाद तिम्सिनाको मुद्दामा ऐतिहासिक फैसला हुने भएको छ । यो फैसलाले दुर्गाप्रसाद मात्र नभउ उनीजस्तै मानसिक अवस्था कमजोर भएकाहरुको समस्यालाई पनि सम्बोधन गर्ने मुद्दाको सुनुवाइ गरेका न्यायाधशिले बताएका छन् । कलकत्ता उच्च न्यायालयमा सोमबार अन्तिम सुनुवाइपछि न्यायाधशिले यस्तो बताएका हुन् ।

भारतीय जेलको रेकर्डमा पहिले दीपक जैसी नाम दर्ता गरेर राखिएका दुर्गाप्रसादको मुद्दा सुनुवाइ नै नभएको खुलासापछि पछिल्लो समय उनको मुद्दाको सुनुवाइ सुरु भएको थियो । उनको मुद्दामा सोमबार हुने सुनुवाइ अन्तिम सुनुवाइ हुने र उनी सोमबार नै जेलबाट छुट्ने अपेक्षा गरिएको थियो । सोमबारको सुनुवाइ अन्तिम त भयो तर न्यायाधीशले सोमबार फैसला भने सुनाएनन् ।

कलकत्ता उच्च न्यायालयका मुख्य न्यायाधीश थोट्टाथिल बी नायर राधाकृष्णन् र न्यायाधीश अनिरूद्ध रोयको संयुक्त इजलासमा सोमबार अन्तिम सुनुवाइ भएको थियो । सुनुवाइपछि मुख्य न्यायाधीश राधाकृष्णनले जेलमा रहेका अरू सबै मानसिक अवस्था कमजोर भएका कैदीहरूका लागि केही दिनभित्रै महत्वपूर्ण फैसला गर्ने बताएका थिए।