पथरी-शनिश्चरे नगरपालिकाका प्रशासकीय अधिकृतसहित छ जनाविरुद्ध भ्रष्टाचार मुद्दा

चुरे भावर संरक्षण कार्यक्रम अन्तर्गत पोखरी निर्माणको लागि प्राप्त भएको रकम पथरी-शनिश्चरे नगरपालिकाका प्रशासकीय अधिकृतसहित छ जनाले भ्रष्टाचार गरेको थाहा भएको छ।

अख्तियार दुरुपयोग अनुसन्धान आयोगले प्रशासकीय अधिकृत अम्बिकाप्रसाद धमला, इञ्जिनियर कृष्णप्रसाद कोइराला र सव-इञ्जिनियर लीलाराज भट्टराईविरूद्ध विशेष अदालतमा मुद्दा दायर गरेको छ।

उनीहरूले २४ लाख २७ हजार ५४५ रुपैयाँ भ्रष्टाचार गरेको पाइएपछि बिहीबार विशेष अदालतमा मुद्दा दायर गरिएको अख्तियारले जनाएको छ।

पोखरी निर्माण भइसकेको भनी गलत कार्यसम्पन्न प्रतिवेदन तयार गरी स्वीकृत गरेको, गलत प्रतिवेदन पेश तथा जाँचपास गरी भ्रष्टाचार गरेको देखिएको अख्तियारको दाबी छ।

यस्तै, चुरे संरक्षण पोखरी निर्माण उपभोक्ता समितिका अध्यक्ष कुलबहादुर गुरुङ, सचिव नवीन ढकाल र कोषाध्यक्ष विनिता देवानलाई पनि मुद्दामा प्रतिवादी कायम गरिएको छ। कर्मचारीसँग मिलेमतो गरेको देखिएपछि उनीहरूलाई पनि प्रतिवादी कायम गरिएको अख्तियारले जनाएको छ।

मुद्दा लागेका सबैलाई जनही २४ लाख २७ हजार ५४५ रुपैयाँ बिगो माग गरिएको छ।