क्रिकेट इतिहासमै भारतको लागि लाजमर्दो दिन, आइसीसीको उत्कृष्ट टिममा कुनै भारतीय छैनन्

काठमाडौं । विश्वकपको खेलमा पाकिस्तानसँग हारेपछि नै लाजमर्दो अवस्थाको सामना गरिरहेको भारतीय क्रिकेट टिमको लागि आज झनै लाजमर्दो दिन बनेको छ । अन्तर्राष्ट्रिय क्रिकेट परिषदले विश्वकपको समाप्तिसँगै विश्वकपमा खेलेका खेलाडीहरुमध्येबाट सर्वोत्कृष्ट प्लेइङ ११ घोषणा गरेको छ । यो टिममा आइसीसीले एक जना पनि भारतीय खेलाडीलाई राखेको छैन ।

पाकिस्तानी कप्तान बाबर आजमलाई आइसीसीले यो टिमको कप्तानको जिम्मेवारी दिएको छ । बाबर आजमले विश्वकपमा पाकिस्तानलाई सेमिफाइनलसम्म पुर्याउन महत्वपूर्ण भूमिका निभाएका थिए । विश्वकपमा सबैभन्दा धेरै रन बनाउने खेलाडी पनि उनी नै हुन् । उनले ६ खेलमा ६०.६ को औसतमा र १२६.२५ को स्ट्राइक रेटमा ३०३ रन बनाएका थिए । ६ खेलमा बाबरले ४ अर्धशतक बनाए ।

आइसीसीको सर्वोत्कृष्ट टिमको छनोट गर्ने प्यानलमा इयान बिशप, शेन वाटसन, नताली जर्मनोस, पत्रकारहरु लरेन बुथ र शाहीद हाशमी थिए । आइसीसीको सर्वोत्कृष्ट टिममा ब्याटिङ क्रमको हिसाबले क्रमशः डेभिड वार्नर, जोस बटलर, बाबर आजम (कप्तान), चरित असलंका, एडेन मार्करम, मोइन अली, वानिन्दु हसरंगा, एडम जाम्पा, जोश हेजलउड, ट्रेन्ट बोल्ट र एनरिक नोर्त्जे छन् । १२ औं खेलाडीको रुपमा शाहीन शाह आफ्रिदीलाई राखिएको छ ।