आज विश्व क्यान्सर दिवस

काठमाडौं । आज विश्व क्यान्सर दिवस नेपालमा पनि विभिन्न सचेतनामुलक कार्यक्रम गरेर मनाइँदैछ ।

क्यान्सर दिवस हरेक वर्ष फेब्रुअरी ४ मा मनाइन्छ । ‘बढ्दैछ चुनौति क्यान्सरको, पहुँच बढाऔँ स्याहारको’ भन्ने नाराका साथ यस वर्ष नेपालमा पनि विभिन्न सचेतनामुलक कार्यक्रम गरेर यो दिवस मनाउन लागिएको हो ।

नेपालमा वार्षिक २० देखि ३० हजारसम्म क्यान्सरका नयाँ बिरामी थपिने गरेको डरलाग्दो तथ्यांक छ । त्यसमध्ये १२ देखि १८ हजारको मृत्यु त्यसै वर्ष हुन्छ । यस्तै नेपालमा हरेक दिन ४० जनाको क्यान्सर रोगका कारण मृत्यु हुने गरेको छ ।

चिकित्सकका अनुसार क्यान्सर रोगको प्रमुख कारक धूमपान र जीवनशैलामा आएको परिवर्तन हो । विश्वमा सबैभन्दा बढी क्यान्सर हुने स्तन क्यान्सर हो भने त्यसपछि फाक्सोको क्यान्सर हुने गरेको पाइएको छ ।

नेपालमा भने सबैभन्दा बढी फोक्सोमा क्यान्सर भएको पाइएको छ भने पाठेघरको मुखको क्यान्सर, स्तन क्यान्सर, पेट र ठूलो आन्द्राको क्यान्सर, मुख तथा रगतको क्यान्सर बढी हुने गरेको विश्व स्वास्थ्य संगठनले जनाएको छ ।

क्यान्सर नसर्ने रोग भएको हुँदा यसबाट जोगिन सुर्तीजन्य पदार्थको सेवन नगर्ने, सँधै शारिरिक व्यायाम गर्ने तथा स्वच्छ तथा सन्तुलित खानामा ध्यान दिनुपर्ने चिकित्सक बताउँछन् ।