झापाका ३० बाढीपीडितलाई घर

बनियानी । झापाको झापा गाउँपालिका–७ जनमघुटुका ३० बाढीपीडितले घर पाएका छन् । गाउँपालिका, सहारा नेपाल र युएन ह्याबिट्याटको सहयोगमा यहाँका विपन्न ३० बाढीपीडितले सुरक्षित घर पाएका हुन् ।

स्थानीय स्रोतसाधनको प्रयोग गरेर परम्परागत शैलीका घर निर्माण गरिएको गाउँपालिकाका अध्यक्ष जयनारायण शाहले जानकारी दिए । उनका अनुसार घर निर्माणका लागि गाउँपालिकाले प्रतिघर रु ७५ हजार, सहारा नेपालले प्राविधिक सहयोगसहित रु २५ हजार र युएन ह्याबिट्याटले रू ५० तथा घरधनीको श्रमदान गरी कूल रु एक लाख ५० हजार बराबरको लागतमा घर निर्माण गरिएको हो ।

नवनिर्मित ३० मध्ये १९ घर सन्थाल घरपरिवारका रहेका छन् । “अझै पनि धेरै बाढीपीडित घरबारविहीन अवस्थामा छन्”, अध्यक्ष शाहले भने, “अन्य सहयोगी संस्थाहरुसँगको सहकार्यमा उहाँहरुको पनि घर निर्माण गरिनेछ, सहयोगी संस्थाहरुलाई सहकार्य गर्न म आग्रह गर्दछु ।”

सहारा नेपालका कार्यकारी निर्देशक महेन्द्र गिरीले स्थानीय तह र विभिन्न सङ्घसंस्थासँगको सहकार्यमा विपन्न घरपरिवारको घर निर्माण गर्दै जाने बताए । सो गाउँपालिकासहित कनकाई नगरपालिका, अर्जुनधारा नगरपालिका, हल्दिबारी र गौरीगञ्ज गाउँपालिकामा सम्बन्धित स्थानीय तह, सहारा नेपाल र युएन ह्याबिट्याटबीचको सहकार्यमा करीब दुई सय घर निर्माण भइरहेको कार्यकारी निर्देशक गिरीले जानकारी दिए ।