आर्मीले जित्यो कर्णाली प्रीमियरको उपाधि

काठमाडौँ । सुर्खेतमा जारी वाइवाइ कर्णाली प्रीमियर लीग क्रिकेटको उपाधि विभागीय टिम आर्मी क्लबले कब्जा गरेको छ ।

शनिबार सुर्खेको कालिञ्चोक मैदानमा भएको फाइनलमा बुटवलको न्यु होराइजनलाई ५९ रनले पराजित गर्दै आर्मीले लगातार दोस्रो पटक उपाधि उचालेको हो ।

उपाधि सहित आर्मीले ५ लाख रुपैयाँ प्राप्त गर्यो । उपविजेता होराइजनले २ लाखमा प्राप्त गर्यो ।

१ सय ४६ रनको लक्ष्य पछ्याएको होराइजन १८ ओभर ३ बलमा ८७ रनमा समेटियो । होराइजनका लागि बिशाल सुनारले २६ रन बनाए ।

निश्चल चौधरीले १९, राहुल प्रजापति १२ तथा सुनिल धमलाले ११ रन बनाए । अन्य खेलाडीले दोहोरो अंकको स्कोर छुन सकेनन् ।

आर्मीका जितेन्द्र मुखिया र शाहब आलमले समान ३–३ विकेट हात पारे ।

टस जितेर ब्याटिङ गरेको आर्मीले निर्धारित ओभरमा ६ विकेट गुमाउदै १ सय ४६ रन बनाएको थियो ।

हरिबहादुर चौहानले ५६ रनको अर्धशतकीय पाली खेल्दा राजु रिजालले ३४ तथा भीम शार्कीले २१ रन बनाए । होराइजनका बिकाश श्रेष्ठले २ विकेट लिए ।

फाइनल खेलका म्यान अफ द म्याच आर्मीका हरि बहादुर चौहान घोषित भए ।

लीगको प्लेयर अफ द सीरिज होराइजका कप्तान शक्ति गौचन बने भने उत्कृष्ट ब्याट्सम्यान कर्णाली ११ का कप्तान रविन्द्र जंग शाही भए ।