आन्दोलन हुने भएपछि देशभर इन्टरनेट र टेलिभिजन बन्द !

काठमाडौं – इन्टरनेट तथा टीभी सेवा प्रदायक समन्वय समितिले आन्दोलनको घोषणा गर्दै देशभरको इन्टरनेट र टेलिभिजन सेवा बन्द हुने जनाएको छ ।

नेपाल विद्युत् प्राधिकरणले वृद्धि गरेको महसुल निकै चर्को भएको र आफूहरुले तिर्न नसक्ने भएपछि प्राधिकरणले टीभी तथा इन्टरनेट सेवा प्रदायक कम्पनीहरूको तारहरू काट्ने भएको हो ।

विद्युत् प्राधिकरणले एकलौटी ढंगमा २०७५ साउन १ देखि पोलमा तार टाङ्ने र अप्टिकल फाइबर बिछ्याएको भाडा दर ५०० प्रतिशतले वृद्धि गरेको र आफूहरूले तिर्नै नसक्ने सेवा प्रदायकको गुनासो छ ।

प्राधिकरणले एकलौटी रुपमा वृद्धि गरेको भाडा दर पुनरावलोकन गर्न इन्टरनेट तथा टीभी सेवा प्रदायक समन्वय समितिले प्रधानमन्त्रीदेखि ऊर्जा, अर्थ र सञ्चारमन्त्रीलाई ज्ञापन पत्र बुझाउँदा पनि कुनै सुनुवाइ नभएपछि तार काटिने अवस्थामा पुगेको बताइएको छ ।

टीभी तथा इन्टरनेट सेवा प्रदायक कम्पनीलाई प्राधिकरणले नयाँ भाडा दरमा सम्झौता गर्न सात दिनको समयसीमा तोकेको थियो । उक्त समय सीमा शुक्रबार सकिएको छ ।