जनकपुरको तयारी : छत–छतमा सेना/प्रहरी, सुनसान जानकी मन्दिर

काठमाडौँ । नेपालको तीन दिने राजकीय भ्रमणमा रहेका भारतीय राष्ट्रपति प्रणव मुखर्जी शुक्रबार जनकपुर भ्रमणमा जाँदै छन् । उनको स्वागतको तयारी पूरा भएको छ ।

राष्ट्रपति मुखर्जी जानकी मन्दिरको दर्शनको लागि जनकपुर आउने कार्यक्रम तय भएपछि नगरको सरसफाइ र बिभिन्न किसिमको सजावटले सिंगारिएको छ । राष्ट्रपति मुखर्जीले जानकी मन्दिरमा विशेष पूजा गर्ने कार्यक्रम छ ।

जनकपुरलाई अहिले उच्च सुरक्षाको घेरामा राखिएको छ । बिहिबार सुरक्षाकर्मीले उनको स्वागतको पूर्व अभ्यास गरिएको छ । पूर्वअभ्यासको क्रममा पसलहरु समेत बन्द गराइएको थियो भने तस्विर संकलन पनि गर्न दिइएको थिएन । जनकी मन्दिर वरपर सुरक्षाकर्मीको व्यापक उपस्थिति थियो । घरको छतमा समेत सेना र प्रहरी देखिन्थे ।

जनकपुरमा राष्ट्रपति मुखर्जीलाई उपप्रधान मन्त्री तथा गृहमन्त्री विमलेन्द्र निधीले स्वागत गर्नेछन् । मुखर्जीले जानकी मन्दिरको पूजा गर्नेछन् र जनकपुरको तिरहुतिया गाछीमा हुने नागरिक अभिनन्दन समारोहमा सहभागी हुनेछन् । उनको स्वागतका लागि जनकपुर विमानस्थलदेखि तिरहुतिया गाछीसम्म विशेष सरसफाइ गर्नुका साथै सजावट र प्रवेशद्वार निर्माण गरिएको छ ।

राष्ट्रपति मुखर्जी जानकी मन्दिरको दर्शन र नागरिक अभिनन्दनमा सहभागी भई पोखरा जानेछन् ।