लीलामणि पौडेल सम्मानित

काठमाडौं । वागमति सफाई अभियन्ता लीलामणि पौडेलले वाग्मती सफाई अभियान अहिलेसम्मकै सबैभन्दा लामो स्वयंसेवी अभियान भएको बताएका छन् ।
शनिबार काठमाडौंको गोठाटारमा पुडासैनी समाजको सम्मान ग्रहण गर्दै अभियन्ता पौडेलले सम्मान, पद र प्रतिष्ठाका लागि नभइ निस्वार्थ रुपमा वाग्मति सफाइ अभियानमा लागेकाले यसले एक सय ८२ औं हप्तासम्म पनि निरन्तरता पाएको बताए । उनले सामाजिक चेतनाको भावना, स्वाभिमान जगाउन र हामी गर्न सक्छौं भन्ने भावनाले मात्र आफूले वाग्मति सफाइ अभियानको नेतृत्व गरेको बताए ।

उनले वाग्मतिलगायत उपत्यकामा रहेका नदीहरुको सरसफाइ र व्यवस्थापनमा ध्यान दिनुपर्ने अधिकार सम्पन्न वाग्मति सभ्यता एकीकृत विकास आयोजन लगायत विभिन्न नदी करिडोर आयोजनाले प्रभावकारी रुपमा काम गर्न नसक्दा अझै पनि वाग्मती बाहेकका नदिहरु प्रदुषित नै रहेको बताए ।
पूर्व मुख्यसचिवसमेत रहेका पौडेलले जिम्मेवार निकायले प्रभावकारी काम नगर्दा अझै पनि नदी किनारमा ढल बिछ्याउने काम सम्पन्न नभएको टिप्पणी गरे ।
नदी किनारा अत्याधिक रुपमा अतिक्रमित हुँदा पनि प्रदुषण भएकाले सरकारले ति क्षेत्रको संरक्षण गर्नुपर्ने धारणा राखे ।