गोलको वर्षासँगै लिभरपुल शीर्ष स्थानमा, युनाइटेड विजयी

लिभरपुल । वार्टफोर्ड विरुद्ध आधा दर्जन गोल गर्दै लिभरपुल प्रिमियर लिगको शीर्ष स्थानमा उक्लेको छ । प्रशिक्षक जर्गन क्लपको नेतृत्वमा लिभरपुल प्रिमियर लिगको शीर्ष स्थानमा उक्लेको यो पहिलो अवसर हो ।

उत्कृष्ट आक्रमक खेल प्रस्तुत गरेको लिभरपुलका लागि एकतर्फी खेलमा साडियो मानेले दुई तथा फिलिपे काउन्टिन्हो, एमरे च्यान, रोबर्टो फर्मिन्हो र जर्जिनो विज्नाल्डमले एक–एक गोल गरे ।

वार्टफोर्डका लागि डार्यल जनमातले सान्तवना गोल गरे ।

यो सिजन लिभरपुलले चार वा सोभन्दा बढी गोल गरेको यो पाँचौ अवसर हो । ११ खेलमा लिभरपुलले ३० गोल गरिसकेको छ ।

लिगको शीर्ष स्थानमा रहेको म्यान्चेस्टर सिटी बराबरीमा रोकिएपछि त्यसको फाइदा उठाउँदै लिभरपुल शीर्ष स्थानमा उक्लिएको हो ।

११ खेलपछि लिभरपुलको २६ अंक रहेको छ ।

अन्य खेलमा खराब लयबाट गुज्रिरहेको म्यान्चेस्टर युनाइटेडले स्वान्सीविरुद्ध ३–१ को जीत निकालेको छ । यसअघि ४ खेलमा जीतविहिन रहेको युनाइटेडले स्वान्सीविरुद्ध सहज जित हासिल गरेको हो ।

शुरु देखि नै खेलमा हाबी भएको युनाइटेडका लागि पाउल पोग्बाले खेलको १५ औं मिनेटमा गोल गर्दै अग्रता दिलाए ।

त्यसपछि गोल गर्न नसकेको भनेर आलोचना खेपिरहेका ज्लाटान इब्राहिमोविचले दुई गोल गर्दै पहिलो हाफमा युनाइटेडलाई ३–० को अग्रता दिलाए ।

खेलको दोस्रो हाफमा माइन भान डर होर्नले स्वान्सीका लागि गोल गरेपनि खेलमा फर्कन सकेन ।

जितसँगै युनाइटेड लिगको छैटौँ स्थानमा उक्लेको छ ।

उता, हिजै भएको लण्डन डर्बी १–१ गोलको बराबरीमा सकिएको छ ।

केभिन विमरको आत्मघाती गोलको मद्दतले आर्सनलले खेलमा अग्रता लिए पनि खेलको दोस्रो हाफमा घाइते भएर टोलीमा फर्किएका ह्यारी केनले पेनाल्टी मार्फत गोल गर्दै खेल बराबरी गरे ।

बराबरीसँग आर्सनल लिगको चौँथो स्थानमा रहेको छ भने टोटनहम पाँचौ स्थानमा रहेको छ ।