ललितपुरमा ट्राफिक कारवाही परे, अब बग्गीखाना जान नपर्ने

ललितपुर । महानगरीय ट्राफिक प्रहरी महाशाखाले सर्वसाधारणहरुलाई सजिलो पार्नको लागि ललितपुरको सम्पूर्ण ट्राफिक गतिविधि तथा कामकारबाही सातदोबाटोबाट सुरु गरेको छ ।

महाशाखाका प्रमुख प्रकाश अर्यालले सर्वसाधारणलाई ट्राफिक कामकारबाही सम्बन्धि सहज बनाउन यस्तो कार्य सुरु गरेको बताए ।

चालकले कुनै गल्ती गरेपनि चालकको कागजपत्र महाशाखा नै पुग्ने भएकाले यस्तो झन्झट हटाउने उद्देश्यका साथ ललितपुरमा कम्प्युटर प्रणालीबाट यस्तो कार्य सुरु गरेको ललितपुर ट्राफिक प्रहरी प्रमुख सिताराम हाछेथुले बताए ।

उनले यस्तो कार्य लागू हुने बित्तिकै समयको बचत हुने, ट्राफिक गतिविधि समेत कम हुने, महाशाखामा हुने भीड पनि कम हुने, आफ्नै घर नजिकै ट्राफिक कामकारबाही हुने भएकाले स्थानीयहरु र ललितपुरको रुटमा चल्ने सवारी साधनका चालक तथा धनीहरुलाई सहज हुने बताए ।

ललितपुर ट्राफिक प्रहरीका अनुसार ललितपुरमा दैनिक चार सयदेखि पाँचसम्म कारबाही हुँदै आएका थिए । अब त्यस्ता कारबाहीको छिनोफानो सातदोबाटो ट्राफिक प्रहरीले गर्ने भएको छ ।

यसबाहेक ललितपुरमा हुने सवारी दुर्घटनाका मुद्दा पनि सातदोबाटोबाट नै टुंग्याइने हाछेथुले बताए ।

सातदोबाटोस्थित जनसयोगबाट निर्माणधिन ट्राफिक प्रहरी भवन पूर्ण भएपछि लेनको र मापसेको कक्षा पनि सातदोबाटोबाट नै हुने उनले बताए ।