एप्पलको पाइला पछ्याउँदै सामसङः आइफोन सेभेनको प्रतिस्पर्धामा उतार्दै ग्यालेक्सी एस सेभेन

आउँदो डिसेम्बरमा सामसङले रङ छनोटसँगै सामसङ ग्यालेक्सी एससेभेन सार्वजनिक गर्ने तय गरेको छ ।
एप्पलको चिल्लो कालो आइफोनसँग प्रतिस्पर्धा गर्नका लागि सामसङले ग्यालेक्सी एससेभेनलाई बजारमा उतार्न लागेको बताइएको छ ।

गत अगस्टमा ग्यालेक्सी नोट सेभेन लञ्च गरेपछि स्मार्टफोनको दुनियाँमा सामसङको उत्कृष्ट छवि रहन सफल भएको थियो । कम्पनीको ग्यालेक्सी एससेभेन र ग्यालेक्सी एससेभेन एजले फोन लञ्चको क्रममा निकै राम्रो समिक्षा पाएको थियो भने यी दुई सबैभन्दा बढि बिक्रि हुने एन्ड्रोइड फोन बन्न सफल भएको थियो ।

कोरियास्थित आफ्नो स्रोतले दाबी गरे अनुसार सामसङले आफ्नो नयाँ चम्किलो कालो रङमा उपलब्ध हुने ग्यालेक्सी एस सेभेनले सामसङको बिक्रिमा बढोत्तरी गर्ने र यो एप्पलको ‘जेट ब्ल्याक आइफोन सेभेन’ को काउन्टरमा उतार्न लागिएको सामसङले बताएको छ ।

एप्पलको ‘जेट ब्ल्याक’ र कालो रङका अन्य विकल्पजस्तै सामसङको चिल्लो कालो ग्यालेक्सी एस सेभेन पनि कालो रङहरुमध्येको दोस्रो प्रकार हुने बताइएको छ । एप्पलले आइफोन सेभेन र सेभेन प्लसमा ‘जेट ह्वाइट’ फोन निकाल्ने हल्ला चलिरहेका बेला सामसङले पनि चिल्लो सेतो रङको फोन यसमा संलग्न गर्न बेर छैन ।

चिल्लो कालो ग्यालेक्सी एस सेभेन दक्षिण कोरियाभन्दा बाहिर उपलब्ध हुने नहुने भन्ने विषयमा पनि केही खबर आएको छैन । एन्ड्रोइडको नयाँ र सबैभन्दा ठूलो भर्सनलाई ग्यालेक्सी एस सेभेन र एस सेभेन एजमा समावेश गर्ने कसरतमा सामसङ लागिपरेको बताइएको छ ।