सडक दुर्घटनामा परी छोराको मृत्यु भएको ठाउँमा बाबुको पनि मृत्यु

पाल्पा । बुटवलदेखि सदरमुकाम तम्घास आउँदै गरेको जिप पाल्पाको अर्घेलीमा दुर्घटना हुँदा १ जनाको मृत्यु भएको छ भने १० जना घाइते भएका छन् ।

बुधबार राती ८ बजे लु१झ २४४८ नम्बरको जिप दुर्घटना हुँदा गुल्मी मुसीकोट नेकपा माओवादी केन्द्र ९ नम्बर इलाका संयोजक ५२ वर्षीय बसन्त कार्कीको मृत्यु भएको हो ।

उनको लुम्बिनी मेडिकल कलेजमा उपचारको क्रममा निधन भएको प्रहरीले बताएको छ ।

त्यस्तै दुर्घटनामा परी भीमलाल सापकोटा र प्रकाश कार्की गम्भिर घाइते भएका छन् । स्थानीय स्कुलका प्रअ समेत रहेको भीमलाल सापकोटाको अवस्था जानुक रहेको प्रहरीले बताएको छ ।

सापकोटालाई सुरुमा लुम्बिनी मेडिकल कलेजमा भर्ना गराए पनि त्यहाँबाट पाल्पा रिफर गरी बुटवल पठाएको थियो । बुटवलमा उनको सिटी स्क्यान गरी उनलाई थप उपचारको लागि काठमाडौं लगिँदै छ ।

दुर्घटनामा परी गम्भिर घाइते भएका ३२ वर्षीय प्रकाश कार्कीको पनि लुम्बिनी मेडिकल कलेजमा उपचार भइरहेको छ ।

कुल १० घाइतेमध्ये ८ जनाको अवस्था सामान्य रहेको पाल्पा प्रहरी प्रमुख हरिराज वाग्लेले जानकारी दिए ।

स्मरण रहोस् त्यही सडक खण्डमा केही अर्षअघि बसन्त कार्कीको छोराको पनि सडक दुर्घटनामा ज्यान गएको थियो ।