हालसम्म ६० हजारमा गरियो कोरोना परीक्षण

काठमाडौं । सरकारले हालसम्म ६० हजार ३ सय ७४ जनामा कोभिड–१९ को परीक्षण गरेको छ । आजसम्म १२ हजार ५ सय ७७ को (पिसिआर) विधिबाट र ४७ हजार सात सय ९७ जनाको (आरडिटी) विधिबाट परीक्षण गरेको स्वास्थ्य तथा जनसङ्ख्या मन्त्रालयले जानकारी गराएको छ ।

मन्त्रालयको नियमित पत्रकार सम्मेलनमा मन्त्रालयका प्रवक्ता डा विकास देवकोटाले हालसम्म २४ हजार ९ सय ७ क्वारेन्टाइनमा रहेका र ९४ जना आइसोलेसनमा रहेका जानकारी दिए। आइसोलेसनमा रहेकामध्ये काठमाडौँ उपत्यकामा ५ जना रहेका छन् भने अन्य बाहिरका रहेका जानकारी गराइएको छ ।

गत २४ घण्टामा थप १ हजार ४ सय ४७ वटा परीक्षण गरिएको छ । आज कोरोना सङ्क्रमित पुष्टि भएका दुईसँगै हालसम्म नेपालमा ५९ जनामा सङ्क्रमण पुष्टि भएको छ । जसमा १६ जना निको भएर घर फर्किसकेका छन् भने बाँकी उपचाररत छन् । आज सङ्क्रमण भएका दुवै जना पुरुषलाई उपचारका लागि अस्पताल ल्याउने तयारी भइरहेको पनि मन्त्रालयले जानकारी दिएको छ ।

टेकुस्थित राष्ट्रिय प्रयोगशालामा परीक्षणका क्रममा रुपन्देहीका २५ वर्षीर्य र बाँकेको नेपालगञ्जका ६० वर्षीयमा सङ्क्रमण देखिएको हो । हालसम्म सङ्क्रमितमध्ये ४९ पुरुष छन् भने १० महिला रहेका छन् । मन्त्रालयका प्रवक्ता देवकोटाका अनुसार उपचाररत कोरोना सङ्क्रमित व्यक्ति सबैको स्वास्थ्यस्थिति सामान्य रहेको छ । त्यसैगरी, रेडजोनमा ३ सय १५ रहेका र तीनको स्वास्थ्यकर्मीमार्फत सम्बोधन भइरहेको छ । कोरोना भाइरसबारे जानकारी लिनका लागि स्वमूल्याङ्कन फारम हालसम्म २९ हजार ३ सय ८४ ले भरेका छन् ।

पछिल्लो सयम केही स्थानमा अत्यावश्यक स्वास्थ्य सेवा सुचारु नभएको गुनासो प्राप्त भएको भन्दै अत्यावश्यक सेवा नियमित सञ्चालन गर्न सम्बन्धित सबै अस्पताललाई पुनः आग्रह गरिएको छ । आगामी दिनमा पनि बिरामीले सेवा नपाएको गुनासो आए मन्त्रालयले अनुगमन गरी कारवाही गर्ने चेतावनी दिएको छ । मन्त्रालयले खोपजन्य सामग्री कम्तीमा तीन महिनासम्मलाई पुग्ने हुँदा विभिन्न जिल्लामा स्थानीय तहसँग समन्वय गरेर नियमितरुपमा खोप अभियान सञ्चालन गर्न आग्रह गरिएको छ ।