‘कोरोना संक्रमित बढेसँगै अक्सिजन अभाव हुने देखियो’

काठमाडौं । चिकित्सकहरूले कोरोना संक्रमितको संख्या बढेसँगै उपचारमा प्रयोग हुने अक्सिजनको अभाव हुने देखिएको जनाएका छन् ।

संसद्को शिक्षा तथा स्वास्थ्य समितिमा सोमबार भएको छलफलमा चिकित्सकहरूले भारतबाट आउने अक्सिजनको आयात रोकिएका कारण कोरोनाको समयमा अक्सिजनको अभाव हुने देखिएको जनाएका हुन ।

छलफलमा त्रिवि शिक्षण अस्पतालका कार्यकारी निर्देशक डा. दिनेश काफ्लले अक्सिजनको आयात रोकिएका कारण अब कोरोनाका बिरामीको उपचारमा नै समस्या हुने देखिएको जानकारी दिनुभयो ।

यस्तै बाँसबारी स्थित शहिद गंगालाल राष्ट्रिय ह्दयरोग केन्द्रका निर्देशक डा. चन्द्र मणी अधिकारीले हाल मुटुको शल्यक्रिया गर्दा आवश्यक पर्ने कतिपय औषधि समेत अभाव हुने देखिएको बताउनुभयो । औषधिको आपूर्ति कम हुँदा हाल १० देखि १५ जना बिरामीको मात्र शल्यक्रिया गर्ने औषधि रहेको जानकारी दिनुभयो ।

पाटन अस्पतालका निर्देशक डा. रवि शाक्यले हाल गत वर्षको जस्तो कोभिडको मात्र बिरामीलाई प्राथमिकतामा राख्नु भन्दा नन कोभिडको बिरामीलाई पनि प्राथमितामा राख्न सरकारलाई सुझाव दिनुभयो । संक्रमण बढे सँगै आईसीयू कक्ष, जनशक्ति र उपचारमा प्रयोग हुने रेमडिसिभर औषधिको समेत अस्पतालमा अभाव भएको बताउनुभयो ।

समितिमा वीर र भक्तपुर अस्पतालका निर्देशहरूले संक्रमितको संख्या उकालो लाग्दै गर्दा अक्सिजन , आईसीयू र जनशक्तिको अभाव हुने बताएका छन् ।